म्याग्दी, माघ ११ गते । गाविस सचिवहरूले सम्बन्धित गाउँमै बसेर कार्यसम्पादन नगर्दा स्थानीयवासीलाई सामान्य कामकाजका लागि पनि हजारौंँ रुपियाँ खर्चेर सदरमुकाम आउनुपरेको म्याग्दीको दाना गाविसका सेवाग्राहीले बताएका छन् । द्वन्द्वकालमा विस्थापित भएको गाविस भवन पुनःनिमाण भएको तीन वर्ष बितिसक्दा पनि सचिव गाउँमा नबसेपछि नागरिकता, जन्मदर्ता तथा विभिन्न स-साना कामका लागि निकै समस्या भोग्नुपरेको सेवाग्राहीको गुनासो छ । गाविस सचिव तिलकबहादुर बीसीलाई गाउँमा बस्न अनुरोध गर्दा आफूहरूलाई उल्टै धम्क्याउनेगरेको स्थानीय गंगाबहादुर पाइजाले बताउँदै गाउँमा भवन हुँदाहुँदै सदरमुकाममा कार्यालय राखेको भन्दै भाडा, बिजुलीलगायतको बिल महिनै पिच्छे पेस गर्नुहुन्छ भन्नुभयो ।

उहाँले भन्नुभयो- हामीले केही कुरा गन खोज्दा सचिवले सीडीओ, एलडीओ कसैसँग म डराउँदिन भन्नुहुन्छ । अब हामी कहाँ गएर न्याय खोज्ने ? सोमबार जिल्ला विकास समितिमा न्यायको खोजीमा आएका पाइजाले स्थानीय विकास अधिकारीलाई हस्तलिखित निवेदनसमेत दिनुभएको छ ।

गाउँ परिषद्मा पनि सचिवले आफू अनुकूलका व्यक्तिहरूलाई सदरमुकाममा डाकेर कार्यालय सञ्चालन गरेको बिल भरपाई बनाइ पारित गरेको, स-साना कामका लागि पनि गाउँलेहरूलाई सदरमुकाम धाउन बाध्य बनाएको पाइजाले गुनासो गर्नुभयो ।

यता गाविस सचिव बीसीले भने पाइजाले पूर्वाग्रह राखेर आफूलाई आरोप लगाएको बताउनुभएको छ । पुस २५, २६ र २७ गते मात्रै गाविसको परिषद् सकेर बेनी फर्किएको थिएँ । उहाँले भन्नुभयो- जहाँसम्म घरभाडाको बिलको कुरा छ, त्यो कात्तिक अगाडिकै हो, कात्तिकयताको बिल पेस गरेकै छैन ।

स्थानीय विकास अधिकारी चक्रपाणि शर्माका अनुसार जिविसले गत कात्तिकदेखि नै सचिवलाई गाउँ जान अनुरोध गरिसकेको छ । मङ्सिरयता सदरमुकाममा कार्यालय स्थापना गरेको भन्दै घरभाडाको बिल ल्याएमा जिविसले स्वीकृत नगर्ने भन्दै उहाँले केही सचिवहरू गाउँ नगएको कुरालाई भने स्वीकार गर्नुभयो । तथ्यगत सूचना पाएमा गाउँ नबस्ने सचिवहरूलाई कारबाही गर्न पनि पछि नपरिने उहाँको भनाइ छ । म्याग्दीका ४१ गाविसमध्ये अधिकांश गाविसका सचिवहरूले भने केही महिनाअघि नै गाउँमै बसेर कार्यसम्पादन सुरु गरिसकेका छन् ।