बाँके, माघ १२ गते । अनौपचारिक क्षेत्र सेवा केन्द्र -इन्सेक) ध्यपश्चिमाञ्चल क्षेत्रीय कार्यालय नेपालगन्जले मध्यपश्चिम क्षेत्रको शान्ति सुरक्षाको अवस्थामा अपेक्षाकृत सुधार हुन नसकेको जनाएको छ ।

इन्सेकले पछिल्लो तीन महिनामा मध्यपश्चिम क्षेत्रमा भएका साना हातहतियार, विस्फोटक पदार्थको प्रयोग, हतियारसहित पक्राउ, राजनीतिक दलहरूबीचको झडप, बन्द, धार्मिक समुदायबीचको झडपलगायतका घटनालाई समावेश गरी सार्वजनिक गरेको सुरक्षा अवस्थाको सूचकमा यस क्षेत्रको शान्ति सुरक्षामा अपेक्षाकृत सुधार आउन नसकेको उल्लेख गरिएको हो ।

इन्सेकका क्षेत्रीय संयोजक भोला महतले सशस्त्र द्वन्द्वमा माओवादीद्वारा कब्जा गरिएका घरजग्गा मङ्सिर ७ गतेभित्र फिर्ता गर्ने ठूला तीन राजनीतिक दल र संयुक्त मधेसी मोर्चाबीच कात्तिक १५ गते लिखित प्रतिबद्धता गरे पनि सहमति कार्यान्वयन हुन नसकेको बताउनुभयो ।

बर्दियाको राजापुर क्षेत्रका कब्जा जमिन फिर्ता गरिएकै दिन एमाओवादीका कार्यकर्ताले पुनः कब्जा गर्नुका साथै अन्य जिल्लामा कब्जा घरजग्गा फिर्ता अभियान सञ्चालन हुन नसकेकोे प्रतिवेदनमा उल्लेख छ ।

यसैगरी यस अवधिमा दलहरूबीचको द्वन्द्व, अन्तरपार्टी द्वन्द्व, भातृ सङ्गठनबीचका द्वन्द्व चर्किदै गएको इन्सेकको तथ्याङ्कमा भनिएको छ । तीन महिनामा मध्यपश्चिम क्षेत्रमा सुरक्षासँग सम्बन्धित रहेका ६० घटना भएकोमा साना हातहतियार र विस्फोटक पदार्थको प्रयोग सम्बन्धी ३१ घटना भएको इन्सेकद्वारा प्रकाशित स्थिति सूचकमा उल्लेख छ ।

बाँकेको नेपालगञ्जमा बम बनाउँदै गरेको अवस्थामा एकको मृत्यु भएको र सोही घटनामा दुई जना घाइते भएको, दैलेखमा एक बालकलाई बिस्कुट चोरेको आरोपमा आफ्नै बाबुले अचानोमा हात राखी धारिलो हतियारले औँला काटिएको हृदयविदारक घटना र बर्दिया जिल्लामा बम विस्फोटनमा परी यस अवधिमा दुई जना घाइते भएको लगायतका घटना स्थिति सूचकमा समावेश छ ।