डडेल्धुरा, माघ १२ गते । चुरे क्षेत्रका बासिन्दा, स्थानीय राजनीतिक दलका अगुवा र सरोकारवाला सबैले भित्री मधेसको चुरे क्षेत्रलाई संरक्षित वन घोषणा गर्न वन मन्त्रालयसँग माग गरेका छन् । चुरे क्षेत्रको फडानीको अनुगमन गर्न अएको वन मन्त्रालयको उच्चस्तरीय टोलीलाई भेटेर सरोकारवालाहरूले उक्त माग राखेका हुन् ।
कञ्चनपुरको शुक्लाफाँटा वन्यजन्तु आरक्षसँग जोडेर वा बेग्लै संरक्षण क्षेत्र बनाउन पनि सरोकारवालाले आग्रह गरेका छन् । संरक्षित क्षेत्र नहुँदासम्म चुरेमा हुने वन फडानी रोकिने सम्भावना छैन, स्थानीय समाजसेवी हरिप्रसाद भट्टले भन्नुभयो-अहिलेको सक्रमणकालीन अवस्थामा वन फडानी रोक्न सम्भव नभएकाले संरक्षित क्षेत्र घोषणा गरिनु पर्छ । चारैतिरबाट चुरेमाथि प्रहारभइरहेको अवस्थामा चुरे संरक्षण अभियानमा लागेका एमाले नेता पठान सिंह बोहराले फडानीका कारण कैलाली कञ्चनपुरमा समेत बाढीको प्रकोप बढेकाले चुरे क्षेत्रलाई संरक्षण क्षेत्र घोषणा गर्नु पर्छ भन्नुभयो ।
डडेल्धुराको भित्री मधेस क्षेत्रमा गत चार वर्षको अवधिभित्रै वन सखाप हुने गरी फडानी भएको हो उहाँले भन्नुभयो । फडानीकै कारण दुईसय भन्दा बढी परिवार घरबारविहीन बन्न पुगेका छन् ।
तराईमा भएको वन फडानीले तराईका जिल्ला र पहाडमा भएको फडानीले भित्री मधेस क्षेत्र बगरमा परिणत भएको छ, नेपाली काँग्रेसका नेता धर्मानन्द भट्टले भन्नुभयो । वन फडानी नरोकिए यो क्षेत्र बच्न सक्दैन र यहाँका लाखौँ बासिन्दा विस्थापित हुनुको विकल्प छैन ।
दुई वर्षअघि मात्रै ६० परिवारको बस्ती सिमलखेत गाउँ बगरमा परिणत भएपछि अहिलेसम्म पनि उनीहरू बिचल्लीमै छन् । सामुदायिक वनहरूको छेउछाउमा अस्थायी घर टहरा बनाएर बसेका छन. सरकारका मन्त्रीदेखि प्रधानमन्त्रीले समेत अनुगमन गरेर र्फकेका हुन् तर कुनै सीप चलेन, स्थानीसवासी भट्टले भन्नुभयो ।
जिल्लाका सबै सरोकारवाला र राजनीतिक दलले पटक पटक चुरे क्षेत्रमा फडानी रोकी संरक्षण क्षेत्र घोषणा गर्न निर्णय गरेको जानकारी दिँदै काँग्रेस डडेल्धुराका उपसभापति कैलाशकुमार पाण्डेयले भन्नुभयो- वन मन्त्रालयका वरिष्ठ अधिकारीहरू सम्मिलित टोलीलाई संरक्षण क्षेत्र घोषणाका लागि सबै क्षेत्र एकमत छन्, घोषणा गरिदिनु पर्यो भनेका छन् । स्थानीय सरोकारवालाको आग्रहपछि वन मन्त्रालयका सहसचिव तथा अनुगमन टोलीका संयोजक डा. कृष्णचन्द्र पौडेलले भौतिक संरचना र वन फडानीको अवस्थालाई हेर्दा संरक्षण क्षेत्र बनाउनु आवश्यक रहेको देखियो भन्नुभयो ।
वन मन्त्रालयका उपसचिव तथा अनुगमन टोलीका सदस्य दीपक ज्ञवालीले पश्चिममा महाकाली नदीदेखि पूर्वमा चिसापानीको कणर्ाली नदी, उत्तरमा जोगबुढाको पुन्तुरा खोला र दक्षिणमा पूर्वपश्चिम राजमार्ग सीमा राखी संरक्षित क्षेत्र बनाउन सकिने बताउनुभयो ।
डडेल्धुरामा भइरहेको व्यापक वन फडानीको एक वर्षमा मात्रै १४ वटा टोलीले अनुगमन गरेको तथ्याङ्क छ तर कारबाहीका नाममा यस वर्ष मात्रै दुईजना सहायक वन अधिकृतलाई निलम्बन गरिएको छ भने सात वटा सामुदायिक वनका अध्यक्षलाई पक्राउ गरेर प्रहरी हिरासतमा राखिएको छ ।
