अर्घाखाँची, माघ १४ गते । अर्घाखाँचीको सदरमुकाम सन्धिखर्कमा हिजोआज सार्वजनिक जग्गा अतिक्रमण गरेर प्लटिङ गर्ने र घर बनाउने कार्यको लहर चलेको छ । राजनीतिक सङ्क्रमणकालको फाइदा उठाएर सन्धिखर्कका केही धनी व्यक्तिले सार्वजनिक जग्गा अतिक्रमण गर्ने र घर तथा घडेरी बनाएर सोझा मानिसलाई बेच्ने दैनिकी जस्तै बनेको छ ।

जग्गा दलालहरूले अहिले बाँगी खोलाको पानी बग्ने ठाउँमा तारजाली राखेर बाटो उठाउने र जग्गा अतिक्रमण गरेर हातको हिसाबले बेचिरहेका छन् । भण्डै ३० मिटर खोलाको भाग रहेको बाँगी खोलालाई जग्गा दलालहरूले अहिले पाँच/छ मिटरमा मात्र सीमित पारेका छन् । उता घोचेखोला र भद्री खोलाको किनारमा खोलाको स्थान रहेको सार्वजनिक जग्गामा धमाधम घरहरू निर्माण गरिएका छन् ।

सन्धिखर्कका खोल्सा-खोल्सी, सार्वजनिक जग्गा मात्र नभएर चुत्राबेसीको बाँगी खोला, घोचेखोला र भद्री खोलाको आसपासमा झण्डै ३० घर सार्वजनिक जग्गामा बनेको स्थानीय बासिन्दाको भनाइ छ । सन्धिखर्कको गुन्टीखोला, इसाराटोल, खोल्सो चुत्राबेसीको भक्तिटोला, प्रगतिबजार, पुरानो बसपार्क पेट्रोलपम्प लाइन र रतहलेको क्षेत्रमा पनि व्यापक रूपमा सार्वजनिक जग्गा अतिक्रमण भएको छ ।

सन्धिखर्क नगरपालिका बनेपछि जग्गा अतिक्रमण गर्न र सार्वजनिक जग्गामा घर बनाउन पाइँदैन भनेर यतिबेला त्यस्ता जग्गा अतिक्रमण गरेर घर बनाउनमा व्यस्त छन् । उनीहरू भन्छन् "सार्वजनिक जग्गामा घर बनाइसकेपछि कसैले डोजर लगाएर भत्काउन सक्दैन । तत्काल घर बनाएपछि थोरै रकम तिरेर उम्कन पाइन्छ ।"

सार्वजनिक जग्गा अतिक्रमणले गर्दा एकातिर सरकारी सम्पत्ति घटिरहेको छ जग्गा दलालहरू रातारात करोडपति बन्दैछन्, अर्कोतिर खोल्सा-खोल्सीको जग्गा मिचिँदा अर्घाखाँचीमा प्राकृतिक प्रकोपको खतरा बढेको उद्योग वाणिज्य सङ्घका अध्यक्ष कृष्णप्रसाद श्रेष्ठले बताउनुभयो ।

सार्वजनिक जग्गा अतिक्रमण गर्ने गरिब, दीन-दुःखी कोही पनि छैनन् सन्धिखर्कका पहुँचवाला र धनी व्यक्ति र नाम चलेका व्यापारी रहेका छन् । जग्गा व्यवसायीहरूले अर्घाखाँचीको सदरमुकाम सन्धिखर्कमा प्रतिहात ५० हजारदेखि तीन लाख रुपियाँसम्म रकम असुलेर त्यस्ता घडेरी बिक्री गर्दै आएका छन् । 

सरकार र वित्त क्षेत्र र बैङ्कले घर घडेरीमा कर्जा प्रदान नगरे पनि पछिल्लो दुई वर्ष यता अर्घाखाँचीको सदरमुकाम सन्धिखर्क र आसपासका क्षेत्रहरूमा जग्गाको प्लटिङ गरेर घडेरी बिक्री गर्ने क्रम प्रतिदिन बढ्दै गएको छ ।

प्रमुख जिल्ला अधिकारी केशवराज घिमिरेले जग्गासम्बन्धी यस्तो समस्या समाधानका लागि स्वेतपत्र जारी गरी अगाडि बढ्ने तयारी भइरहेको जानकारी दिनुभयो । राम्रो काम गर्दा र सार्वजनिक जग्गा बचाउन खोज्दा अर्घाखाँची छोड्नु परे छोड्न तयार रहेको उहाँको भनाइ छ ।