नवलपरासी, माघ १४ । जिल्ला प्रहरी कार्यालय र त्यस मातहतका कार्यालयमा रहेका प्रहरीहरूलाई रासन उपलब्ध गराउने जिम्मा लिएका ठेकेदारले गुणस्तरहीन खाद्य सामग्री उपलब्ध गराएको भन्दै प्रहरीहरूले खाद्य सामग्रीको सट्टा रकम नै दिनुपनर्ेे माग गरेका छन् ।
उनीहरूले विभिन्न खाद्य सामग्रीसहित १४ प्रकारका खाद्यान्न उपलब्ध गराउनुपर्ने भए पनि अधिकांश खाद्य सामग्रीसमेत उपलब्ध नगराएको बताए ।
माघ १ गतेदेखि जिल्ला प्रहरी कार्यालयसहित मातहतमा रहेका ३८ वटा युनिटमा रहेका प्रहरीहरूलाई दैनिक ६६ रुपियाँका दरले रासन उपलब्ध गराउन काठमाडौँस्थित गोङ्गबुमा रहेको रचना खाद्य सप्लायर्सले ठेक्का लिएको जिल्ला प्रहरी कार्यालयले जनाएको छ ।
रासनबापत गत वर्ष मासिक दुई हजार नौ सय
रुपियाँका दरले रकम बुझ्दै आएकोमा यस वर्ष रकम कम भएकाले खाद्य सामग्री नै लिने सहमति भएको थियो, सो कार्यालयले जनाएको छ ।
एक करोड ६९ लाख रुपियाँमा रासन ठेक्का लिएका सप्लायर्सका ठेकेदार रमेशकुमार पाठकले सम्झौता गराएको चामल गुणस्तरहीन रहेको र पकाउँदा काचै हुने र कहिलेकाहीँ लिटो हुने चामल पठाउने गरेको प्रहरीको भनाइ छ ।
तरकारी पनि दिनदिनै एकैनासको र कम मूल्य पर्ने त्यसमा पनि स्वच्छ नभएको अधिकांश प्रहरीहरूको गुनासो छ । डेढगाउँ, बुलिगटार, धौबादीलगायतका युनिटमा अझै पनि खाद्यन्न सामग्री नपुगेको जनाइएको छ ।
जिल्ला प्रहरी कार्यालयका प्रहरी उपरीक्षक ज्ञानविक्रम शाहले ठेकेदारले उपलब्ध गराउनुपर्ने १४ किसिमका सामग्री उपलब्ध हुन नसकेको जानकारी दिनुभयो ।
उहाँले चामल गुणस्तरहीन नभएको तर नयाँ चामल परेकाले धेरै पकाउँदा कहिले काँचो र लिटो हुने गरेको बताउनुभयो । चामलकोे गुनासो आएपछि ठेकेदारले पठाएको नयाँ चामल गोदाममा राखी पुरानो चामलको व्यवस्था गरिएको उहाँले बताउनुभयो ।
