काठमाडौँ, माघ १८ गते । राष्ट्रिय प्रजातन्त्र पार्टी नेपालका अध्यक्ष कमल थापाले प्रधानमन्त्री डा. बाबुराम भट्टराईलाई भेटी स्थानीय निकायको निर्वाचनसम्बन्धमा ज्ञापनपत्र हस्तान्तरण गर्नुभएको छ ।
सो ज्ञापनपत्रमा स्थानीय तहमा जनप्रतिनिधित्वको शून्यताले गर्दा संविधानसभाको प्रभावकारीतामा असर परेको कुरा उल्लेख गरिएको छ ।
त्यस्तै लामो राजनीतिक अस्थिरता, जनप्रतिनिधिमूलक निकायहरूमा जनसेवा तथा जनउत्तरदायित्वको चरम अभाव, दण्डहीनता एवं अराजकताको स्थितिबाट आमनागरिक अत्यन्त पीडित भएको ज्ञापनपत्रमा रहेको छ ।
राप्रपा नेपालले अविलम्ब स्थानीय निकायको निष्पक्ष, स्वतन्त्र र धाँधलीरहित किसिमले प्रजातान्त्रिक प्रक्रियाबाट निर्वाचन सम्पन्न गर्न माग गरिएको छ ।
