विराटनगर, चैत २० गते। मनाङ मस्र्याङ्दी क्लब र हङकङ नेप्लिज फुटबल टिमबीच विराट गोल्डकप फुटबल प्रतियोगिताको क्वाटरफाइनल खेल सोमबार स्थगित गरिएको छ।
आयोजक कमिटीको आपत्कालीन बैठकले यो खेल भोलि खेलाउने निर्णय लिएको छ।
निर्धारित समय र थपिएको समयसम्म दुवै टिम २-२ गोलले बराबरीमा रोकिएपछि टाइब्रेकरको निर्णय लिइएको थियो तर हङकङ टिमले पेनाल्टी प्रहार गर्न तयार भए पनि मनाङका खेलाडी र पदाधिकारीहरूले उज्यालो कम भएको कारण देखाउँदे टाइब्रेकरमा जान अस्वीकार गरे।
यसअघि, मनाङका लागि अनिल गुरुङ र आयातित खेलाडी एमबील स्टेफनले गोल गरे। खेलको १२औँ मिनेटमा अनिलको गोलबाट मनाङले अग्रता बनाएको थियो तर हङकङ नेप्लिजले खेलको २१ र २६ औँ मिनेटमा लगातार दुई गोल गरी मनाङलाई स्तब्ध पार्यो।
विशाल राईले करिब २० गजबाट सशक्त प्रहारद्वारा गोल गरी खेल बराबर पारेको पाँच मिनेटपछि नै नरेन लिम्बूले पनि गोल गरेपछि मनाङ अप्रत्यासित रूपमा पछाडि परेको थियो।
यद्यपि मनाङले स्टेफनको गोलबाट पूर्वार्द्धमा नै खेल बराबर गर्यो। आमिर श्रेष्ठको पासलाई सदुपयोग गर्दै स्टेफनले कठिन कोणबाट बल गोलपोस्टमा छिराएका थिए।
पूर्वार्द्धमा चार गोल भए पनि दुवै टिमलाई मध्यान्तरपछि भने गोलको खडेरी परेको थियो। यद्यपि उत्तरार्द्धको खेल पनि रोमाञ्चक थियो।
