नेपालगन्ज, वैशाख १२ गते। बाँके जिल्लाको प्राचीन एवं मौलिक खेलका रूपमा स्थापित लाठी खेल अहिले आफ्नो अस्तित्व जोगाउन सङ्घर्षरत छ।

त्यसैले सो खेलका अगुवाले लाठी खेललाई राष्ट्रिय खेलकुद परिषद् -राखेप)को मान्यता दिलाएर राष्ट्रिय खेलको सूचीमा सामेल गर्ने अभियान सुरु गरेका छन्। जसका लागि लाठी खेलका अग्रज र प्रशिक्षकहरू नेपालगन्जका राजकुमार आर्य र हिरमिनियाका मुन्ने बेहना जोडतोडका साथ लागिपरेका छन्।

नेपाल लाठी सङ्घ केन्द्रीय समितिको गठन गरेर सो सङ्घभित्र सबै खेलाडीलाई सङ्गठित पार्दै उनीहरूले २०६४ सालदेखि नै विभिन्न प्रतियोगिता गराउँदै आएका छन् तर अहिले तीमध्ये कतिपय खेलले निरन्तरता पाउन सकेका छैनन्। सो खेलले मान्यता नपाएकै कारण सहयोग अभाव भएकोले निरन्तरता दिन नसकिएको हो, भन्छन् मुन्ने बेहना। बाँकेमा निकै लोकपि्रय रहेको लाठी खेलको विकासका लागि जिल्लाका १५ गाविसमा लाठी क्लब गठन गरी करिब तीन सय खेलाडीहरूलाई ती क्लबहरूमा आबद्ध गरिएको पनि जानकारी पनि प्रशिक्षक बेहनाले गराए।

एथलेटिक्सका पूर्वराष्ट्रिय खेलाडी बेहना लाठी खेलप्रति स्थानीय युवाहरूको लगाव र आकर्षण देखेर दौड्न छाडेर लाठी खेलमा लागेका हुन्। सो खेललाई मान्यता दिलाउन पूर्वप्रधानमन्त्रीहरू स्वर्गीय गिरिजाप्रसाद कोइराला, शेरबहादुर देउवा र पुष्पकमल दाहाल 'प्रचण्ड' र दर्जनौै मन्त्रीहरूलाई भेटेर ज्ञापनपत्र बुझाइसकेका छौँ, बेहनाले भने।

सबैले राष्ट्रिय मान्यता दिने भनी वचन दिए पनि कसैले सो बारेमा सुनुवाई नगरेको गुनासो गर्छन् अर्का प्रशिक्षक राजकुमार आर्य। नेपालगन्ज आउने सबै नेता तथा मन्त्रीलाई भेटेर लाठी खेललाई अस्तित्व प्रदान गर्न अनुरोध गर्दै आएका छौँ तर सुनुवाई नहुँदा यसले सयौं खेलाडीको चाहनामा धक्का पुगेको छ, प्रशिक्षक आर्य भन्छन्।

यसबीच लाठी खेललाई मान्यता दिलाउन लाठी सङ्घको केन्द्रीय समिति पुनर्गठन गरिएको छ। नवगठित समितिको अध्यक्षमा मुन्ने बेहनाको चयन गरिएको छ भने उपाध्यक्षमा रामचन्द्र रैदास, महासचिवमा पुष्करनाथ बर्मा, सहसचिवमा मोहनराम मिश्र र कोषाध्यक्षमा अली हुसेन शेष छन्। सदस्यहरूमा राजकुमार बर्मा, अस्फाक जसगढ, मोहम्मद शेर अली र विक्रमजङ्ग थापा रहेका छन्।