नयाँ दिल्ली, वैशाख १२ गते। वीरेन्द्र सहवागले २८ बलमा अर्धशतक बनाएपछि इन्डियन पि्रमियर लिगमा मङ्गलबार देली डेयरडेभिल्सले पुने वारियर्सलाई सजिलै आठ विकेटले पराजित गरेको छ। यस जितसँगै दिल्लीले अङ्क तालिकामा शीर्ष स्थान पनि बनायो। सहवागले ४८ बलमा ८७ रन बनाई अन्तसम्म आउट भएनन्। सहवागको पालिमा सात चौका र तीन छक्का सामेल थियो। केभिन पिटरसनले पनि दुई विशाल छक्का र एक चौका सामेल २७ रनको उपयोगी पालि खेले।
यसअघि, मनिष पाण्डे र रविन उथप्पाले तेस्रो विकेटका लागि अविजित १४५ रनको साझेदारी निर्वाह गरेपछि पुनेले घरेलु मैदानमा पहिले ब्याटिङ गर्दै दुई विकेटको क्षतिमा १४६ रनको योगफल तयार पारेको थियो। देल्लीले २४ बल बाँकी छँदै दुई विकेटको क्षतिमा १४८ रन बनाई जित हासिल गर्यो।
जेसी राइडर र सौरभ गाङ्गुली सस्तामै आउट भएपछि पुनेले स्कोर कार्डमा मात्र रनको खाता खोलेको स्थितिमा दुई विकेट गुमाएको थियो। त्यसपछि मनिष र उथप्पाले घरेलु टिमको पालि सम्हालेका हुन्। मनिषले ५६ बलमा ८० र उथप्पाले ५८ बलमा ६० रन बनाए। यी दुई ब्याट्सम्यानले पछिल्लो दस ओभरमा ९६ रन बटुलेका थिए तर सहवागको ब्याटिङले मनिष र उथप्पाको शानदार ब्याटिङ पनि पर्याप्त भएन।
यसैगरी, सोमबार राति भएको खेलमा रोयल च्यालेन्जर्स बेङ्गलोरले राजस्थान रोयल्सलाई सजिलै ४६ रनले हराएको थियो। तिलकरत्ने डिल्सनले अविजित ७६ रनको पालि खेलेपछि पहिले ब्याटिङ गरेको बेङ्गलोरले तीन विकेटको क्षतिमा १८९ रनको योगफल तयार पारेको थियो। एबी डिभिलियर्सले पनि अविजित ५९ रन बनाए। जवाफमा राजस्थानले सात विकेटको क्षतिमा १४३ रन मात्र बनाउनसक्यो। सो पालिमा कप्तान राहुल द्रविडले सर्वाधिक ५८ रन बनाए। एजेन्सी
