काठमाडौँ, वैशाख १३ गते। नेपालमा पहिलो पटक नेपाल-इण्डिया क्राफ्ट फेष्टिभल नेपाल-भारत हस्तकला महोत्सव आयोजनाको तयारी गरिएको छ।
भारतीय दूतावास, गोवा सरकार, नेपाल पर्यटन बोर्ड र बीपी कोइराला नेपाल-भारत प्रतिष्ठानको सहयोगमा दक्षिण एसिया प्रतिष्ठान -साफ)ले आयोजना गर्ने यस महोत्सवमा नेपालका करिब दुई दर्जनसहित ७० स्टलहरू रहने छन्। महोत्सवमा हस्तकलाका साथै खानाका परिकार, पर्यटनसम्बन्धी स्टलहरू पनि रहने जनाइएको छ।
कला र हस्तकलाका क्षेत्रमा नेपाल र भारतबीचको दुईपक्षीय सम्बन्ध सुदृढ गर्ने उद्देश्यले आयोजना गर्न लागिएको महोत्सव शुक्रबारबाट नेपाल प्रज्ञा प्रतिष्ठानमा सुरु हुनेछ। महोत्सव छ दिनसम्म चल्ने बुधबार आयोजित पत्रकार सम्मेलनमा जानकारी दिइयो।
पत्रकार सम्मेलनमा भारतीय दूतावासकी प्रथम सचिव अपूर्वा श्रीवास्तवले नेपाल र भारतबीच आर्थिक, सामाजिक, सांस्कृतिक क्षेत्रमा निकट सम्बन्ध रहेको भन्दै हस्तकला महोत्सवले दुई मुलुकबीच विविध कला र सिर्जनाको आदान प्रदान गर्न र नयाँ कुरा सिक्न मौका मिल्ने बताउनुभयो।
उहाँले हस्तकलाका क्षेत्रमा भारतले तालिमहरू उपलब्ध गराउँदै आए पनि यस किसिमको महोत्सव पहिलो पटक आयोजना भएबाट हस्तकलाको विनिमय तथा यस क्षेत्रमा सहयोग आदानप्रदान गर्न महìवपूर्ण सहयोग पुग्ने आशा व्यक्त गर्नुभयो।
नेपाल पर्यटन बोर्डका वरिष्ठ निर्देशक सुवास निरौलाले पर्यटकीय हिसाबले भारतमा उत्कृष्ट रहेको गोवाको सहभागिताले नेपालको पर्यटन विकासमा नयाँ कुरा सिक्ने मौका मिल्ने बताउनुभयो। उहाँले महोत्सवबाट दुवै मुलुकमा हस्तकलाका साथै पर्यटनको विकासमा सहयोग पुग्ने भन्दै यस किसिमको महोत्सवलाई निरन्तरता दिनुपर्ने बताउनुभयो।
साफका महासचिव राहुल बरुवाले दक्षिण एसियाली जनताबीचको सम्बन्ध बलियो बनाउन स्थापना भएको यस संस्थाले आयोजना गर्न लागेको हस्तकला महोत्सवबाट हस्तकला र पर्यटनका क्षेत्रमा प्रचुर सम्भावना रहेको नेपालले लाभ लिनसक्ने बताउनुभयो।
प्रमुख आकर्षण गोवा रहने यस महोत्सवमा गोवाका २५ कलाकारहरूको आफ्ना हस्तकला सामग्रीसहित महोत्सवमा प्रतिनिधित्व रहने बताइएको छ। नेपाल र भारतबीच पर्यटनको सम्भाव्यता खोजी गर्ने उद्देश्यले गोवा पर्यटनको सहभागिता गराउन लागिएको आयोजकको भनाइ छ।
नेपालका साथै भारतका आन्द्रप्रदेश, बिहार, उत्तरप्रदेश, ब्याङ्लोर, गुजरातलगायतका हस्तकला सामग्रीको प्रदर्शनी, हस्तकला सम्बन्धी कार्यशाला गोष्ठी हुने यस महोत्सवबाट कला र हस्तकलाका क्षेत्रमा दुई मुलुकबीच बृहत् सहकार्य एवं सहभागिता वृद्धि गर्न मद्दत पुग्ने आशा लिइएको छ ।
