काठमाडौँ, वैशाख १९ गते। प्रधानमन्त्री डा. बाबुराम भट्टराईले नेपालको अन्तरिम संविधानले श्रमिकहरूलाई सङ्गठित हुने अधिकार दिनुका साथै उनीहरूको आधारभूत अधिकारको प्रत्याभूति गरेको छ भन्नुभएको छ। १२३औँ विश्व मजदुर दिवस २०१२ का अवसरमा आज दिनुभएको शुभकामना सन्देशमा उहाँले राज्यका विभिन्न संयन्त्र तथा निकायमा श्रमजीवी वर्गको सहभागिता सुनिश्चित नभएसम्म मुलुकले विकासको गतिमा फड्को मार्न सक्दैन। तसर्थ, नयाँ संविधानमा समेत श्रमिकका अधिकार, नीति निर्माण एवं कार्यान्वयनको तहमा प्रतिनिधित्वको प्रत्याभूति गर्न जरुरी रहेको उल्लेख गर्नुभएको छ।

श्रमशक्तिको रूपमा रहेका अथाह युवा जनशक्तिलाई पर्याप्त रोजगारको अवसर उपलब्ध गराई उनीहरूको ज्ञान, सीप र ऊर्जा मुलुकको विकासमा समाहित गराउन सरकार क्रियाशील रहेको बताउँदै प्रधानमन्त्री डा. भट्टराईले वैदेशिक रोजगारलाई थप सुरक्षित, व्यवस्थित तथा मर्यादित बनाई विदेशमा जाने कामदारको हक, अधिकार र सुविधा सुनिश्चित गर्नु अहिलेको आवश्यकता हो भन्नुभएको छ।

उहाँले वैदेशिक रोजगारसम्बन्धी ऐन नियमको पूर्ण कार्यान्वयन, मुख्य गन्तव्य मुलुकहरूसँग श्रम सम्झौता र रोजगार प्रवर्द्धन तथा विप्रेषणलाई उत्पादनशील क्षेत्रमा परिचालन गराउन आवश्यक रहेको औँल्याउँदै श्रमिकहरूको सुरक्षित जीवन र सुनिश्चित भविष्यका निम्ति वर्तमान सरकार सधैँ प्रतिबद्ध रहेको उल्लेख गर्नुभएको छ।