काठमाडौँ, वैशाख १९ गते। जनकपुरमा सोमबार भएको बम विस्फोटमा परी दिवङ्गत भएकालाई सरकारले शहीद घोषणा गर्ने र आश्रति परिवारलाई १० लाख रुपियाँ आर्थिक सहयोग उपलब्ध गराउने प्रक्रिया अगाडि बढाएको छ।
बम विस्फोटमा परी चार जनाको मृत्यु हुनुका साथै ३४ जना घाइते भएका थिए। घाइतेमध्ये १८ जनाको काठमाडौँमा उपचार भइरहेको छ।
गृह मन्त्रालयका प्रवक्ता शङ्करप्रसाद कोइरालाले भन्नुभयो, 'उक्त घटनामा परी घाइते भएकाहरूको निःशुल्क उपचारको व्यवस्था सरकारले मिलाइसकेको छ। घटनामा परी मृत्यु भएकालाई शहीद घोषणा गर्ने एवं मृतकका परिवारलाई १० लाख रुपियाँ आर्थिक सहायता उपलब्ध गराउनेतर्फ प्रक्रिया अगाडि बढाइसकिएको छ।'
गृह मन्त्रालयले घटनामा परी दिवङ्गत भएकाहरूको परिवारप्रति गहिरो समवेदना तथा घाइतेहरूको शीघ्र स्वास्थ्यलाभको कामना गर्दै यस्ता घटनाबाट विचलित नहुन र सो विस्फोटका विरुद्ध गरिएको जनकपुर बन्द फिर्ता लिई सहयोग गर्न सम्बद्ध सबैसँग हार्दिक अनुरोध गरेको छ।
गृह मन्त्रालयले शान्तिपूर्ण रूपमा आˆना माग राखी धर्ना बसेकाहरूमाथि लक्षित गरी बम विस्फोट गराउनु कायरतापूर्ण र आततायी कार्य भएको भन्दै घटनाको निन्दा गरेको छ। मन्त्रालयले राजनीतिक सहमतिको प्रक्रियाबाट सङ्घीयतासहितको संविधान निर्माण गर्ने कार्यमा राजनीतिक दलहरू प्रयत्नशील भइरहेको यस्तो अवस्थामा सर्वसाधारण जनतालाई लक्षित गरी बम विस्फोट गराउनुले संविधान निर्माण कार्यलाई प्रतिकूल असर पार्न खोजेको महसुस भएको जनाएको छ। यसैगरी, नेपालका लागि संयुक्त राष्ट्रसङ्घीय आवासीय तथा मानवीय संयोजकको कार्यालयले मङ्गलबार एक विज्ञप्ति जारी गरी नागरिकको शान्तिपूर्ण भेलामा गरिएको आक्रमणको कडा निन्दा गरेको छ।
सो घटनाले संयुक्त राष्ट्रसङ्घको नेपालस्थित कार्यालयलाई अत्यन्त दुःखी तुल्याएको भन्दै सो कार्यालयका संयोजक रोबर्ट पाइपरले घटनामा ज्यान गुमाएका परिवारजनप्रति गहिरो समवेदना व्यक्त गर्नुका साथै घाइतेहरूको शीघ्र स्वास्थ्य लाभको कामना गर्नुभएको छ।
संयुक्त राष्ट्रसङ्घ नेपालका सम्बन्धित निकायहरूलाई घटनाको राष्ट्रिय तथा अन्तर्राष्ट्रिय कानुन अनुसार पूर्ण र निष्पक्ष छानबिनका लागि आवश्यक सबै कदम चाल्नसमेत आग्रह गर्दछ, उहाँले भन्नुभएको छ।
पाइपरले नेपालका राजनीतिक पार्टीहरूले शान्ति र संविधानलाई निष्कर्षमा पुर्याउन गरेको प्रयासलाई संयुक्त राष्ट्रसङ्घको साथ रहने पनि बताउनुभएको छ।
यसैगरी, मानव अधिकार तथा शान्ति समाज, पि|mडम फोरम, महेन्द्रनारायण निधि स्मृति प्रतिष्ठान, मैथिल ब्राहृमण सभालगायतका सङ्घसंस्थाहरूले मङ्गलबार विज्ञप्ति जारी गरी उक्त घटनाको भत्र्सना तथा निन्दा गर्दै सत्यतथ्य छानबिन गरी दोषीलाई कडा कारबाही गर्न सरकारसँग माग गरेका छन्।
उता, जनकपुरको रामानन्दचोकमा सोमबार भएको बम विस्फोटमा घाइते भई काठमाडौँको शिक्षण अस्पतालमा उपचार गराइरहेकामध्ये एक जनाको अवस्था गम्भीर बन्दै गएको छ।
गम्भीर घाइते भई सोमबार नै शल्यक्रिया गरिएका दीपेन्द्र दासको अवस्था बिग्रँदै गएको अस्पतालले जनाएको छ। विस्फोटनमा चार जनाले ज्यान गुमाएका थिए।
शिक्षण अस्पतालले जनकपुरबाट काठमाडौँ ल्याई उपचार गराइरहेका १९ जनामध्ये एकजना उपचारपछि फर्केको र बाँकी घाइतेको सोही अस्पतालमा उपचार भइरहेको जनाएको छ।
यसैबीच, बृहत् मधेसी मोर्चा र संयुक्त दबाब समूहले मङ्गलबार छुट्टाछुट्टै विज्ञप्ति जारी गरी सो घटनाको घोर भत्र्सना गरेको छ।
एमाओवादी, काँग्रेस, एमाले तथा संयुक्त लोकतान्त्रिक मधेसी मोर्चालगायत विभिन्न २५ दलका सभासद् सम्मिलित बनेको बृहत् मधेसी मोर्चाले जारी गरेको विज्ञप्तिमा घटनाका दोषी कारबाहीको माग गर्दै मृतकलाई शहीद घोषणा गरी, मृतक परिवारलाई क्षतिपूर्तिलगायत घाइतेलाई उपचार तथा राहत उपलब्ध गराउन सरकारसँग माग गरेको छ।
विस्फोटको घटनालाई सङ्घीयताविरोधीको सङ्ज्ञा दिएको छ। त्यस्तै, मधेस मिडिया तथा अनुसन्धान केन्द्र, मधेस फर राइट्स, तराई लयर्स एसोसिएसन, तराई मानव अधिकार रक्षक सञ्जाल, मधेस मिडिया हाउसलगायत १७ वटा सङ्घसंस्थाले संयुक्त रूपमा हस्ताक्षर गरी संयुक्त मधेसी दबाब समूहको नामबाट जारी गरेको विज्ञप्तिमा घटनाप्रति समूहको ध्यानाकर्षण भएको जनाइएको छ।
