काठमाडौँ, वैशाख २४ गते। नेपाल दूरसञ्चार कम्पनी -नेपाल टेलिकम)ले आइतबार कतारको दोहामा विशेष कार्यक्रमको आयोजना गरी 'मल्टि सर्भिस प्वाइन्ट अफ प्रेसेन्स' -पप) सञ्चालन गरेको छ।
पपको स्थापनाबाट अन्तरआबद्धता क्षमतामा वृद्धि भएको र सेवाको गुणस्तर वृद्धि तथा प्रभावकारी महशुल दर निर्धारण गर्न सहयोग पुग्ने नेपाल टेलिकमले बताएको छ। नेपाल टेलिकमका प्रवन्ध निर्देशक अमरनाथ सिंह र कतार टेलिकमका अन्तर्राष्ट्रिय व्यापार प्रमुख अल अहमद दर्वेष्टिले संयुक्तरूपमा पप सञ्चालन भएको घोषणा गरेका हुन्।
नेपाल टेलिकमका अनुसार कार्यक्रममा सिंहले त्यस क्षेत्रमा बस्ने नेपाली समुदायलाई सहुलियत दरमा गुणस्तरीय दूरसञ्चार सेवा उपलब्ध गराउन र अन्तर्राष्ट्रिय जगतमा नेपाल टेलिकमको व्यापार थप विस्तार गर्न पप सञ्चालनले सहयोग पुग्ने बताउनु भएको थियो।
त्यस्तै दर्वेष्टिले नेपाल टेलिकमले सञ्चालन गरेको पप विदेशी दूरसञ्चार कम्पनीहरूबाट कतारमा स्थापित बाह्रौँ पप भएको जानकारी दिँदै यसले दुवै देशलाई अन्तर्राष्ट्रिय दूरसञ्चार सेवाको विस्तार गर्न र गुणस्तर वृद्धि गर्न सहयोग पुग्ने बताउनुभयो।
दोहामा पप स्थापना गर्ने सम्बन्धमा दुवै कम्पनीबीच गत असोज २९ गते सम्झौता भएको थियो। विश्वभर रहेका आफ्ना उपभोक्तालाई सहुलियत दरमा गुणस्तरीय दूरसञ्चार सेवा दिने क्रमममा पप स्थापना गरी सञ्चालनमा ल्याएको नेपाल टेलिकमको विज्ञप्तिमा उल्लेख छ।
पप सञ्चालनले कतारलगायतका मध्यपूर्वका अन्य मुलुक साउदी अरब तथा संयुक्त अरब इमिरेट्समा रहेका दूरसञ्चार कम्पनीहरूसँग नेपाल टेलिकमको सीधा सम्पर्क गर्न सहयोग पुग्ने जनाइएको छ।
