काठमाडौँ, वैशाख २५ गते। नेपाल सरकार र युरोपियन बैङ्कबीच आधारभूत सम्झौता सहमति भएको छ।
सो सम्बन्धी सम्झौतामा सोमबार अर्थसचिव कृष्णहरि बास्कोटा र बैङ्ककी उपाध्यक्ष माग्डालेना अल्भारेज अर्जाले हस्ताक्षर गरेका हुन्। आधारभूत सम्झौताको कार्यान्वयन प्रत्येक आयोजनाहरू दुवै पक्षबीच सम्झौता भएका आधारमा हुने जनाइएको छ।
सन् १९५८ मा रोम सन्धि अनुसार स्थापना भएको युरोपियन इन्भेष्टमेन्ट बैङ्क युरोपेली सङ्गठनको दीर्घकालीन कर्जा दिने अन्तर्राष्ट्रिय वित्तीय संस्था हो। यसले आर्थिक रूपमा कमजोर रहेका क्षेत्रको विकासमा सहयोग गर्ने गर्दछ। यो संस्था हाल युरोप, एसियासहित विश्वका १५० राष्ट्रमा सक्रिय छ। उक्त बैङ्कले आफूसँग आधारभूत सम्झौता भएका पक्षहरूसँग वित्तीय सामग्री जस्तै कर्जा, प्राविधिक सहयोग आदि उपलब्ध गराउने गर्दछ।
