दमक, वैशाख २९ गते। माग अनुसारको सिमेन्ट उत्पादन हुन नसकेको भन्दै झापाको चारपानेमा स्थानीय उद्योगीहरूको लगानीमा स्थापना भएको कञ्चनजङ्घा सिमेन्ट उद्योगले आइतबार उत्पादन सुरु गरेको छ।यो सँगै झापामा स्थापना भएको यो पाँचौँ सिमेन्ट उद्योग भएको हो। यसमा अन्य सिमेन्ट उद्योगका लगानीकर्ताहरूले नै साझेदारीमा यो सिमेन्ट उद्योग सञ्चालनमा ल्याएको बताइएको छ। उद्योगका अध्यक्ष मिनप्रकाश मैनालीका अनुसार उद्योगबाट भगवती ब्रान्डको सिमेन्ट उत्पादन सुरु गरिएको छ भने चाँडै नै अन्य ब्रान्डको सिमेन्टसमेत उत्पादन गरिने योजना रहेको छ।

झापामा हिमालयाज, गोरखकाली, मित्तल र मनषा सिमेन्ट उत्पादन हुँदै आएका छन्। यसले मागको पचास प्रतिशतसमेत नधानेको पाइएकाले यी चारवटा उद्योगका सञ्चालकहरू आफैले लगानी गरेर कञ्चनजङ्घा सिमेन्ट उद्योग स्थापना गरेको जनाइएको छ। उद्योगी पवन खेडियाका अनुसार स्थानीय उद्योगहरूको उत्पादनले ४० प्रतिशत बजार मात्र धानेको पाइएको छ। बाँकी ६० प्रतिशत सिमेन्ट वीरगन्ज, उदयपुर र केही भारतबाट समेत अवैध रूपमा नेपाल भित्रिरहेको पाइएकाले स्थानीय स्तरमा नै उत्पादन गर्दा उपभोक्ता लाभान्वित हुने उहाँको भनाइ छ।