बेइजिङ, जेठ ७ गते। विश्वमै आर्थिक वृद्धिदर राम्रो भएको र ठूलो जनसङ्ख्या भएको मुलुक चीनले ज्येष्ठ नागरिकहरूका लागि आवश्यक पर्ने उत्पादन तथा सेवा विस्तारका क्षेत्रमा लगानी बढाउने भएको छ।
चीनमा बढी उमेर भएका जनताको सङ्ख्यामा उल्लेख्य वृद्धि हँुदै गएकोले त्यस वर्गलाई लक्षित गर्दै आवश्यक उत्पादन तथा सेवा विस्तारमा स्वदेशी तथा विदेशी लगानी बढाउने रणनीति लिने भएको छ ।
चाइना डेरीको एक रिपोर्ट अनुसार चीनमा जेठ नागरिकहरूको ठूलो जनसङ्ख्या रहेको मात्र नभएर उनीहरूको आर्थिक स्तर र क्रयशक्ति राम्रो अवस्थामा रहेकोले पनि सो मुलुकमा विदेशी कम्पनीहरू उक्त वर्गका लागि आवश्यक सेवा तथा उत्पादनका क्षेत्रमा लगानी गर्न आकषिर्त भएको बताइएको छ।
ज्येष्ठ नागरिकहरू र शारीरिक अपाङ्गता भएका व्यक्तिहरूका लागि आवश्यक सामाग्री उत्पादन गर्दै आएको एक बेलायती कम्पनीका अध्यक्ष मार्टिन कुकका अनुसार आˆनो कम्पनीको उत्पादनहरूका लागि चीनको बजार उपयुक्त भएकोले आफूहरू चीनमा बजार विस्तार गर्ने रणनीतिमा लागेको बताएका छन्।
कुकका अनुसार सन् १९९० को अवधिमा आˆनो कम्पनीले वृद्धहरूका लागि आवश्यक सामग्रीहरूको उत्पादन चीनमा गर्ने र त्यसलाई युरोपमा लगेर बिक्री गर्ने रणनीति लिएका भए पनि हाल उक्त परिस्थिति बदलिएको र चीनमा नै ज्येष्ठ नागरिकका लागि आवश्यक सामग्रीको माग बढ्न थालेको देखिएको छ।
चीनको सरकारी तथ्याङ्क अनुसार सन् २०११ सम्ममा चीनमा ६० वर्ष भन्दा माथिको जनसङ्ख्या १८ करोड ५० लाख रहेको पाइएको छ भने हाल चिनियाँहरूको आर्थिक स्तर राम्रै अवस्थामा रहेकोले उनीहरूको क्रयशक्ति पनि उच्च नै रहकोले सो वर्गलाई लक्षित गरेर गरिएको सेवा र उत्पादनहरूको बिक्री राम्रो हुने विश्वास गरिएको छ।
चीनमा ज्येष्ठ नागरिकहरूलाई लक्षित गरेर गरिने उत्पादनहरूको बजार करिब ७० अर्ब अमेरिकी डलर बराबरको रहेको बताइएको छ।
