हेटौँडा, जेठ १० गते। लगानीकर्ता बेपत्ता भएपछि बन्द भएको एभरेष्ट पोलिमर्श प्रा.लि. कामदार कर्मचारीहरूले तलब सुविधा पाएका छन्। उद्योग बन्द गरी लगानीकर्ता बेपत्ता भएपछि तलब सुविधाका लागि आन्दोलन गर्दै आएका उद्योगका कामदार कर्मचारीहरूले १५ महिनापछि तलब पाएका हुन्। हेटौँडा औद्योगिक क्षेत्रस्थित उद्योगका कर्मचारीहरूको तलब भत्ताबापतको बक्यौता ऋणदाता बैङ्क हिमालयन बैङ्कले भुक्तानी दिएको उद्योगका मजदुर राधाकृष्ण थापाले जानकारी दिनुभयो।
मजदुरको तलब भत्ताबापत एककरोड ४५ लाख रुपियाँ भुक्तानी दिइएको बताउँदै थापाले क्षतिपूर्तिस्वरुप प्रतिकर्मचारी ८५ हजार रुपियाँ प्रदान गरिएको बताउनुभयो। एभरेष्ट भिनालय उद्योगका मालिकसमेत रहेका उद्योगका सञ्चालक विकास कोठारी फरार भएपछि उद्योग बन्दमात्र होइन अलपत्र बन्न पुगेको थियो। यसअघि एभरेष्ट भिनालयका मजदुरहरूको तलब भत्ताबापतको रकम लगानीकर्ता बैङ्कहरूले भुक्तानी गरेका थिए। एभरेष्ट भिनायल केडिया समूहले र पोलिमर्श बगेडिया समूहले सकारेर सञ्चालन गर्ने तयारी गरेका छन्।
यसअघि नै भिनालयको समस्या समाधान भए पनि पोलिमर्शका मजदुरले आफ्नो बक्यौता नपाएसम्म उद्योग सञ्चालनमा अवरोध पुर्याउने बताउँदै आएका थिए। दुवै उद्योग सञ्चालनमा अवरोध सिर्जना नगर्ने र आवश्यकताअनुसार पुराना कामदार कर्मचारीहरू राखेर उद्योग सुचारु गर्नसक्ने मजदुर नेता थापाले बताउनुभयो। गतवर्ष वैशाखमा कोठारी उद्योगका लागि थप ऋण बैङ्कले नदिएकोले बन्द गर्नुपर्ने अवस्था आएको भन्दै फरार भएका थिए।
एभरेष्ट भिनायलमा हिमालयन, बैङ्क अफ काठमाण्डुलगायतका पाँचवटा बैङ्कहरूको लगानी रहेको थियो। दुवै उद्योगले आफ्नो उत्पादनको अधिकांश हिस्सा भारत निकासी गर्दै आएको थियो।
