काठमाडौँ, जेठ १२ गते। नेपालमा खेलकुद पर्यटनको पर्याप्त सम्भावना भए पनि यसको पबर्द्धनमा अझै पनि सम्बन्धित निकायको ध्यान जान सकेको छैन।
र्याफटिङ, रकक्लाइम्बिङ, प्याराग्लाइडिङ, स्काइ डाइभिङ, बञ्जीजम्पिङजस्ता साहसिक खेलकुदका लागि नेपाल विश्वमा नै उत्कृष्ट मानिन्छ। नेपाल आउने कुल पर्यटक सङ्ख्याको करिब ४० प्रतिशत साहसिक खेलकुदको मज्जा लिन आउने गरे पनि यसको प्रबर्द्धन कसले र कुन निकायले गर्ने भन्नेमा अन्य पनि अन्योल छ।
राष्ट्रिय खेलकुद परिषद् -राखेप)ले अहिलेसम्म खेल पर्यटनको विकासमा कुनै पनि कार्यक्रम अगाडि बढाउन सकेको छैन। नेपाल पर्यटन वर्ष २०११ समुद्घाटन समारोहका निर्देशक एवं राष्ट्रिय खेलकुद परिषद्का वरिष्ठ अधिकृत कुलबहादुर थापा स्वयं पनि परिषद्ले खेलकुद पर्यटन प्रवर्द्धनमा आफूहरूले ध्यान दिन नसकेको स्वीकार्छन्।
थापा भन्छन्— खेल पर्यटनको सम्बन्धमा अध्ययनै हुन सकेको छैन, राष्ट्रिय खेलकुद परिषद्ले केही तोकेको पनि छैन, त्यसकारण ध्यान पुग्न नसकेको हो। नेपालमा सबैभन्दा ठूलो सम्भावना साहसिक खेल पर्यटनको भएकोले यसको ध्यान पुर्याउन भने वर्तमान अवस्थामा नितान्त जरुरी भएको थापा बताउँछन्।
र्याफ्टिङ एण्ड क्यानोइङ सङ्घसँग भएका सामान काम नलाग्ने अवस्थामा रहेको र नयाँ सामान ल्याउन नसकेको तथा भारत, इरान, थाइल्याण्डबाट अनुदानमा पनि सामान ल्याउन नसकेको धारणा सम्बन्धित पक्षको छ।
नेपाल र्याफटिङ एण्ड क्यानोइङ सङ्घका पूर्व महासचिव कुमार रानाभाटका अनुसार अहिले सङ्घसँग भएको सामान पुरानो भएर काम नलाग्ने अवस्थामा छ, नयाँ समान किन्न सकेको छैन। खेलाडी उत्पादन गर्न पनि ध्यान पुग्न नसकेको बताउँदै रानाभाटले केही देशबाट सित्तैमा सामान ल्याउँछौँ भन्दा पनि सोअनुसारको वातावरण नबनेको गुनासो पोखे।
यस्ता सामानमा कर छुट हुनुपर्ने धारणा पनि रानाभाटले भन्नुभयो, सङ्घसँग अहिले दस-पन्ध्र वर्ष अघिको सामान मात्र छ, नयाँ सामान ल्याउन सकिएको छैन, अनि कसरी हुन्छ प्रबर्द्धन। भन्सार छुटबाट यस्ता खेलकुदका सामान ल्याउनुपर्ने धारणा पनि रानाभाटले राखे।
नेपाल र्याफटिङ सङ्घका अध्यक्ष नानीकाजी थापा पनि खेलाडी उत्पादनमा ध्यान जान नसकेको स्वीकार्छन्। पूर्वाधार र नयाँ प्रविधि अवलम्बन गर्न नसक्दा समस्या उत्पन्न भइरहेको छ— उनले भने। थापाले खेल पर्यटन प्रबर्द्धनका लागि वाषिर्करूपले कार्यक्रम तालिका र योजना बनाउन जरुरी भएको बताए।
