विराटनगर, जेठ १५ गते। चार वर्षअघि व्यरवन-८ मुलगाउँकी सावित्री पराजुली घरगृहस्थीमै व्यस्त थियो। गाउँमा मेलापात, आलोपालो र पर्म तिर्ने बाहेक वा कुनै माङ्गलिक र दुःख परेको क्षणभन्दा बाहिर जमघट हुने अवसर थिएन तर अहिले दैनिक स्थानीय महिलाहरूबीच खजाञ्जी भएर रकम गन्नमै व्यस्त हुन थाल्नु भएको छ।
स्थानीयस्तरमा महिला बचत समूह खोलेपछि पराजुलीजस्तै धेरैको दैनिकीले फरक मोड लिएको छ। दश वर्ष अगाडि स्थापना गरिएको महिला बचतले स्थानीय महिलाहरूलाई निक्कै सक्रिय बनाउँदै लगेको छ। स्थानीय महिलाहरूको सक्रियता र पुस्ता हस्तान्तरणसँगै सहकर्मी विमला श्रेष्ठ र पराजुलीले दैनिक बचत समूह हेर्नुपर्ने हुन थालेको छ।
त्यसो त गाउँकै बचत समूहले ऋण दिन थालेपछि किसानले पानी तान्ने मोटर जोड्न थालेका छन्। सहुलियतमा ऋण उपलब्ध गराउनेसम्म हैसियत बनाएको महिला बचत समूहका कारण थोरै खेतमा सिँचाइ गरी तरकारी खेती चाहनेको सपनालाई समेत पूरा गरिदिएको छ। बेमौसमी र मौसमी तरकारी खेतीमा लागेपछि गाउँमा समेत दुई छाक टार्न र एकसरो लाउन कुनै समस्या अहिले छैन।
वि.सं. २०५७ सालमा समूह गठन गरी बचत थालेका व्यरनवनका महिलाहरूले अहिले कोषमा तीन लाख १० हजार रुपियाँ जम्मा गरिसकेको विमला श्रेष्ठ बताउनु हुन्छ। समूहले महिलाहरूको क्षमता विकासमा लगानी गरी विभिन्न तालिम समेत स्थानीयस्तरमा दिदैं आएको समूहकी सचिव समेत रहनु भएकी पराजुली बताउनु हुन्छ।
सुरुमा १० जनाबाट शुभकामना महिला बचत समूहको नाममा बचत सङ्कलन थालेका महिलाको समूहमा अहिले २४ जनाको सहभागिता रहेको छ। महिला बचत भनी सुरु गरिए पनि आउँदा दिनमा कृषि सहकारी बनाउने योजनामा रहेको महिलाहरूले बताएका छन्। दैनिक चिनजान र पहिचान बनाउन सहयोग पुर्याउँदै आएको सहकारीका कारण स्थानीयस्तरमा समेत सहजै ऋण प्राप्त गर्ने माध्यम बन्दै गएको शिवकामना महिला बचत समूहले जनाएको छ।
