काठमाडौँ, जेठ १६ गते। नेपाल स्टक एक्सचेन्जमा सोमबार भएको कारोबारमा नेप्से पाँच दशमलब आठ प्रतिशतको गिरावटसहित चारभन्दा मुनिको बिन्दुमा बन्द भएको छ।
मङ्गलबारको कारोबारमा नेप्सेमा २०.९८ को गिरावट आएर ३९१.८९ बिन्दुमा आइपुगेको भए तापनि कारोबार रकम भने ज्यादै न्यून रहेको छ।
नेप्सेमा मङ्गलबार जम्माजम्मी ५० कम्पनीको छ सय ४७ कारोबारबाट ४३ हजार ३११ कित्ता सेयरको कारोबार भई ८४ लाख ४४ हजार ८५१ रुपियाँ बराबरको सेयरको खरिदबिक्री भएको छ।
मुलुकले नयाँ संविधान पाउन नसकेपछि पुनः राजनीतिक अन्योलता छाएको अवस्थाले सेयर बजारलाई नकारात्मक परिणाम पारेकाले मङ्गलबारको कारोबारमा सेयर बेच्नेको घुइँचो नै लागेको थियो भने त्यसको अनुपातमा खरिदकर्ता ज्यादै कम भएकाले बजारमा उच्च गिरावट आएको हो।
सेयर ब्रोक्ररहरूको अनुसार सेयर बेच्नका लागि थुप्रै अर्डर आएको तर खरिदकर्ता कम भएकाले आगामी केही दिन अझै सेयर बजारमा गिरावट आउन सक्ने
बताइएको छ।
मङ्गलबार सेयरको मूल्य घट्दाको अवस्थामा स-सानो कित्ता सेयरको कारोबार गरेर मात्र मूल्य घटाइएकाले पनि घेरै महिनापछि कारोबार रकम रु. एक करोडभन्दा मुनि भएको छ।
मुलुकमा राजनीतिक अस्थिरता छाएकाले आगामी केहीदिन सेयर बजारमा गिरावट देखिने भए तापनि नेप्सेले वर्तमान अवस्थामा उचाइँ हासिल गरेको अवस्था नरहेकाले सहमतीय सरकारको गठन हुने हो भनेचाहिँ बजार पुनः थामिने विज्ञहरूले बताएका छन्।
नेप्सेमा मङ्गलबार हाइड्रो, उद्योग, टेलिकम, बिमा तथा बैङ्किङ्क सबै क्षेत्रका सेयरको मूल्यमा गिरावट आएको भए तापनि होटल समूहको सेयरमा भने गिरावट आउन पाएन।
नेप्सेमा गुमाउने कम्पनीहरूमा चिलिमे हाइड्रो पावर ८८ रुपियाँ, नेपाल टेलिकम ५० रुपियाँ, लाइफ इन्स्योरेन्स कम्पनी नेपाल ६३ रुपियाँ, युनिलिभर एक सय २८ रुपियाँ, स्ट्यान्डर्ड चार्टर बैङ्क एक सय १५ रुपियाँ, नबिल बैङ्क ८२ रुपियाँ, बैङ्क अफ काठमाण्डू ६८ रुपियाँ, एनआईबी ५६ रुपियाँ, एसबीआई ६३ रुपियाँ, प्रमुख रहेका छन्।
