सल्लेरी, जेठ १६ गते। तेञ्जिङ हिलारी एभरेस्ट म्याराथनको उपाधि मङ्गलबार फुर्वा तामाङले जितेका छन्। एभरेस्ट म्याराथनको यो दसौँ संस्करण हो।

तामाङले तीन घण्टा ४१ मिनेट ३१ सेकेन्डमा निर्धारित दूरी पूरा गर्दै विश्वको सबभन्दा उच्च स्थानमा भएको उक्त म्याराथन उपाधि हात पारे। सगरमाथाको आधारशिविरबाट नाम्चेसम्म ४२.२ किलोमिटरको दूरी सबभन्दा पहिले पूरा गर्ने क्रममा तामाङले कुमार राजभण्डारीलाई पछाडि पारेका थिए।

गतविजेता सुदीप कुलुङ तृतीय भए। धावक कुलुङले यसअघि दुईपटक उक्त म्याराथनको उपाधिमा कब्जा जमाएका थिए। राजभण्डारीले तीन घण्टा ५४ मिनेट ५१ सेकेेण्ड र कुलुङले ४ घण्टा ५४ सेकेण्डमा दूरी पूरा गरे।

यसैगरी २१ किलोमिटरको हाफ म्याराथनमा अमेरिकाका टेम्पे क्याड्वेल पहिलो भए। क्याड्वेल दुई घण्टा ५५ मिनेट ३९ सेकेन्डमा दूरी पूरा गर्दै प्रथम भएका हुन्। अस्ट्रेलियाका थिर्पो नाफुले तीन घण्टा ४४ मिनेट ४१ सेकेन्डमा र भारतका शेखर गायत्रीले तीन घण्टा ५७ मिनेट ३९ सेकेन्डमा निर्धारित दूरी पूरा गरी तृतीय भए।

एभरेस्ट म्याराथनका विजेता तामाङले एक हजार अमेरिकन डलर, उपविजेता राजभण्डारीले पाँच सय डलर र तृतीय हुने कुलुङले तीन सय डलर पुरस्कार हात पारे। हाफ म्याराथनमा प्रथम, द्वितीय र तृतीय हुनेलाई भने क्रमशः पाँच सय, तीन सय र दुई सय अमेरिकी डलर प्रदान गरियो।

महिला वर्गमा नेपालकी आङफुटी सेर्पा प्रथम भइन्। उनले निर्धारित दूरी पूरा गर्न ५ घण्टा १४ मिनेट ४४ सेकेन्ड लगाइन्। नेपालकै मिङ्मा लामा -५ः१५ः५६ सेकेन्ड) र टासी जाङ्मु सेर्पा -५ः४३२३ सेकेन्ड) क्रमशः दोस्रो र तेस्रो भए।

विदेशी धावक वर्गमा अमेरिकाका जेम्स स्कट -५ः२२ः०७ सेकेन्ड) विजेता बने। उनीपछिको स्थानमा भारतका केल्साङ दोर्जे -५ः३८ः२२ सेकेन्ड) र अमेरिकाका रायन वोल्फार्न -५ः४८ः०७ सेकेन्ड) रहे।

एभरेस्ट म्याराथनमा घरेलु तथा विदेशी गरी कुल १६० धावकधाविकाले सहभागिता जनाएका थिए। तेन्जिङ नोर्गे सेर्पा र सर एडमन्ड हिलारीले पहिलोपटक सगरमाथा आरोहण गरेको दिन एभरेस्ट म्याराथन हुँदैगएको छ। तेन्जिङ र हिलारीले सन् १९५३ मे २९ तारिखमा सगरमाथाको सफल आरोहण गरेका थिए।