काठमाडौँ, जेठ २५ गते। अर्थसचिव कृष्णहरि बास्कोटाले आˆनो मन्त्रालय मातहतका निकायको आकस्मिक निरीक्षण गर्ने बिहीबार हरिहरभवनस्थित राजस्व अनुसन्धान विभागको निरीक्षण गर्नुभएको अर्थ मन्त्रालयले जनाएको छ। त्यस क्रममा सचिव बास्कोटाले राजस्व चुहावट नियन्त्रण गर्न विशेष कार्ययोजना तयार गरी काम गर्न र राजमार्गमा आकस्मिक गस्ती बढाउन निर्देशन दिनुभएको छ।

बास्कोटाले सिमावर्ती जिल्लाका प्रमुख जिल्ला अधिकारीहरूलाई प्रत्येक महिना कम्तीमा एक पटक जिल्लास्तरीय राजस्व चुहावट नियन्त्रण समितिको बैठक बस्न र संयुक्त रूपमा गस्ती बढाउन निर्देशन दिनुको साथै भन्सारमा न्यून विजकीकरण गर्ने, गलत वस्तु वर्गीकरण गर्ने, परिमाण कम देखाई भन्सार जाँचपासमा संलग्न रहनेलाई कानुनबमोजिम कारवाही अघि बढाउन आग्रह गर्नुभयो। करको दायरामा नआउने, खुद्रा तहमा मूल्य अभिवृद्धि करको विल विजक जारी नगर्ने, खातापाता सच्याएर वा नक्कली विल विजक तयार गरेर राजस्व चुहावट गर्नेमाथि कडा कारवाही गर्न अर्थसचिव बास्कोटाले मातहतका कर्मचारीहरूलाई निर्देशन पनि दिनुभयो।

निरीक्षणका क्रममा बास्कोटाले विभागका महानिर्देशक संयोजक र गृह मन्त्रालयका सहसचिव, नेपाल प्रहरी र सशस्त्र प्रहरी बलका डी.आई.जी., भन्सार विभागका उपमहानिर्देशक सदस्य रहेको पाँच सदस्यीय टोलीले मुलुकका मुख्यमुख्य स्थानको स्थलगत निरीक्षण गरी एकीकृत र प्रभावकारी रूपमा राजस्व चुहावट नियन्त्रण गर्न सुझाव दिनुभएको थियो।

सीमावर्ती क्षेत्रमा तस्करीका लागि माध्यमको काम गर्ने सामान्य नागरिकलाई के कसरी सो गलत पेशाबाट रूपान्तरण गर्न सकिन्छ भन्नेबारेमा अध्ययन गरी प्रतिवेदन दिन पनि उहाँले आग्रह गर्नुभयो। बास्कोटाले नियमसम्मत काम गर्ने व्यापारी, राष्ट्र निर्माणमा योगदान गर्ने उद्यमी र रोजगारीको अवसर दिने तथा सरकारलाई नियमित कर तिर्ने इमान्दार व्यवसायीलाई सबै प्रकारको सरकारी सुविधा प्रदान गर्न र राजस्व चुहावटमा संलग्न व्यवसायीलाई सूचनाका आधारमा एकिन गरेर कारवाहीको प्रक्रिया अगाडि बढाउन पनि निर्देशन दिनुभएको थियो।