काठमाडौँ, जेठ ३१ गते। नेपालले पहिलोपटक वाइल्डकार्डमार्फत ओलम्पिकमा सहभागी हुन नपाउने भएको छ। लन्डन ओलम्पिक-२०१२ मा नेपाली टोलीमा वाइल्डकार्ड प्राप्त खेलाडी हुनेछैनन्।

अन्तर्राष्ट्रिय ओलम्पिक कमिटी -आईओसी)ले बार्सिलोना ओलम्पिक -सन् १९९२) देखि खेलकुदको महाकुम्भ मेलामा वाइल्डकार्डमार्फत ओलम्पिकमा सहभागी हुने प्रावधान राखेको थियो। जसको फाइदा उठाउँदै नेपालले वाइल्डकार्डमार्फत निरन्तर ओलम्पिकमा सहभागिता जनाउँदैआएको थियो। वाइल्डकार्ड नपाएपछि एथलेटिक्सका तिलकराम थारू, प्रमिला रिजाल तथा पौडी खेलाडी प्रसिद्धजङ शाह र श्रेया धिताल मात्र लन्डन ओलम्पिकमा जाने भाग्यमानी नेपाली खेलाडी बनेका छन्। पौडी र एथलेटिक्सका खेलाडीले ओलम्पिकमा अनिवार्य रूपमा सहभागिता जनाउनुपर्ने प्रावधान छ।

सन् १९६४ कोे टोकियो ओलम्पिकदेखि नेपालले सहभागिता जनाउँदैआएको छ। नेपाल ओलम्पिक कमिटी -एनओसी)का अध्यक्ष ध्रुवबहादुर प्रधानले वाइल्डकार्डमा सिफारिस गरिएका खेलाडीप्रति अन्तर्राष्ट्रिय ओलम्पिक कमिटी -आईओसी)ले खासै चासो नदेखाएपछि खेलाडीको ओलम्पिकको यात्रा टुङ्गिएको बताए। एनओसीले बक्सिङका पूर्णबहादुर लामा, सन्जु लामा, सरस्वती राना, तेक्वान्दोकी आयशा शाक्य, रोहित तामाङ, सुटिङका स्नेहाराज्य लक्ष्मी राणा, अस्मिता राई, जुडोका दीपककृष्ण श्रेष्ठ, फुपुल्हामु खत्री, साइक्लिङका अजय पण्डित क्षेत्री र निर्जला ताम्राकारलाई वाइल्डकार्डका लागि सिफारिस गरेको थियो।

आईओसीलाई पहल गर्दा सम्बन्धित सङ्घ र सरकारबाट पर्याप्त सहयोग पाएनौँ, वाइल्डकार्ड नपाउनुको एउटा कारण यो पनि हो, यो नेपाली खेलकुदको दुर्भाग्यपूर्ण क्षण हो -अध्यक्ष प्रधानले भने। गत ओलम्पिकमा सहभागी आठ जनामध्ये तेक्वान्दोका दीपक विष्टले भने छनोट चरण पार गरी बेइजिङ ओलम्पिक खेलेका थिए। उनले वाइल्डकार्डबाट प्रतिस्पर्धा गर्न मौका पाएका थिए।