काठमाडौँ, जेठ ३२ गते। एकीकृत नेकपा माओवादीका अध्यक्ष पुष्पकमल दाहाल 'प्रचण्ड'सँग युरोपियन युनियन सम्बद्ध देशका राजदूतहरूले बिहीबार भेटवार्ता गर्नुभएको छ। अध्यक्ष निवास लाजिम्पाटमा भएको भेटमा राजदूतहरूले संविधानसभाबाट संविधान जारी हुन नसकी अन्त्य भएकोप्रति चासो व्यक्त गर्दै त्यसपश्चात् पार्टीहरूबीच उत्पन्न असमझदारीले "अब नेपालको राजनीतिक अवस्था कसरी अगाडि बढ्छ ?" भनी जिज्ञासा राखेको अध्यक्ष 'प्रचण्ड'का सहयोगी शिव खकुरेलले जानकारी दिनुभयो।

सहयोगी खकुरेलका अनुसार जवाफमा अध्यक्ष 'प्रचण्ड'ले पहिचानमा आधारित सङ्घीयतासहितको संविधान जारी गर्ने विषयमा पार्टीहरूबीच समझदारी हुन नसकेकाले संविधानसभा विघटन हुन पुगेको बताउँदै आफू अन्तिम समयसम्म सहमतिका लागि प्रयास गरिरहे पनि संविधान जारी हुन नसकेको बताउनुभयो।

साथै उहाँले फेरि पनि सहमतिको कुनै विकल्प नभएको बताउँदै राजनीतिक दलहरूबीच एउटा उच्च प्रकारको राजनीतिक संयन्त्र सहमतिका आधारमा बन्नुपर्ने र त्यसले समग्र कुराको हल गर्नुपर्नेसमेत बताउनुभयो। उहाँले आगामी बजेटमा पार्टीहरूले सहमति गरी बजेट प्रस्तुत गर्न सहयोग गर्नुपर्ने बताउनुभयो।

अध्यक्ष 'प्रचण्ड'सँगको भेटपछि सञ्चारकर्मीसँगको कुराकानीमा युरोपेली सङ्घका राजदूत अलेक्जेन्डर स्पाचिसले माओवादी अध्यक्ष 'प्रचण्ड'सँग समसामयिक राजनीतिक अवस्था तथा शान्ति, संविधानलगायतका विषयमा छलफल भएको बताउनुभयो। उहाँले लोकतान्त्रिक मूल्य तथा उपलब्धि संस्थागत गर्न दलहरूबीच सहमति गर्न र राष्ट्रिय सरकार गठन गर्न आफूहरूले आग्रह गरेको बताउनुभयो। राजदूत स्पाचिसले नेपालको शान्ति, समृद्धि र स्थायित्वका लागि सघाउन सङ्घ सदैव तत्पर रहेको बताउँदै दलहरूले आपसी सहमतिबाट निकास खोज्न अध्यक्ष 'प्रचण्ड'को ध्यानाकर्षण गराएको जानकारी दिनुभयो।

राजदूतहरूले आफूहरू नेपालमा शान्ति, उन्नति र प्रगति भएको हेर्न चाहेको बताउँदै सहयोग जारी रहने प्रतिबद्धतासमेत जनाएको सहयोगी खकुरेलले जानकारी दिनुभयो।