रौतहट, जेठ ३२ गते। रौतहटको नमुना गाउँ विकास समिति चन्द्रनिगाहपुरमा स्थापना भएका निजी लगानीका वित्तीय संस्थाहरूबाट सरल एवम् सहजरूपमा आर्थिक सेवा प्रदान हुन लागेपछि जिल्लाका उद्योगी तथा व्यापारीहरू बैङ्किङ सेवाका लागि अन्यत्र धाउनु पर्ने बाध्यताबाट मुक्त भएका छन्।

कृषि विकास तथा नेपाल बैङ्क मात्रै रहेको चन्द्रनिगाहपुरमा सधंै भिडभाड भइरहनाले भुक्तानी समस्या, झन्झटिलो ऋण लगानी प्रक्रियालगायतका कारण जनाउँदै स्थानीय व्यापारीहरू वीरगञ्ज, हेटौंडा, सिमरालगायतका निजी क्षेत्रका वित्तीय बैङ्कबाट बैङ्किङ सेवा लिँदै आएका थिए। अहिले चन्द्रनिगाहपुरमै निजी क्षेत्रका चारवटा बैङ्कको स्थापना भएपछि सहज आर्थिक कारोबारका लागि अन्यत्र जानुपर्ने झन्झटबाट मुक्त भएको व्यापारीहरू बताउँछन्।

निजी लगानीका वित्तीय संस्थाहरूले शाखा कार्यालय खोल्न अहिले चन्द्रनिगाहपुरमा होडबाजी नै गरिरहेको पाइन्छ। परम्परागत प्रक्रियाको अनुसरण गरेका सरकारी बैङ्कहरूमा हुने गरेको ढिलासुस्ती, लामो र झन्झटिलो ऋण सुविधाका कारण उद्योगपति तथा व्यापारीहरू छिटो र छरितो बैङ्किङ सेवा लिन निजी लगानीका विकास बैङ्कतर्फ आकषिर्त भएको स्थानीय व्यापारी सुनिल साह बताउनुहुन्छ। सुरक्षाको दृष्टिकोणले पनि चन्द्रनिगाहपुरमा निजी क्षेत्रका वित्तीय बैङ्क खोल्न सरल र सहज भएको जनाउँदै बैङ्कका सञ्चालकहरुले निकट भविष्य मै चन्द्रनिगाहपुरमा एभरेस्ट र कर्मसियल लगायतका बैङ्कको शाखा कार्यालय स्थापना हुनेसमेत बताएका छन्।

रौतहटमा निजी लगानीका वित्तीय बैङ्क नहुँदा अन्यत्र गई बैङ्किङ कारोबार गर्नुपर्ने समस्या झेल्र्दै आएका यहाँका उद्योगी तथा व्यापारीहरू अहिले चन्द्रनिगाहपुरमै आधा दर्जनभन्दा बढी निजी क्षेत्रका बैङ्क स्थापना हुन लागेको देख्दा हषिर्त छन्। चन्द्रनिगाहपुरमा स्थापित नेपाल बैङ्क र कृषि विकास बैङ्कले अहिले आएर आधुनिक पद्दति अनुसार कारोबार गरेको पाइएता पनि उनीहरूको तुलनामा निजी क्षेत्रका बैङ्कहरूमा आर्थिक कारोबारमा वृद्धि हुँदै गएको बैङ्कका एक कर्मचारीले बताउनुभयो। कृषि विकास बैङ्कले चालू आर्थिक वर्षमा ऋण प्रवाह नै नगरेका कारण कृषकहरू ठूलो समस्यामा परेका छन्। उनीहरूसमेत ऋणका लागि निजी क्षेत्रका बैङ्कहरूमा पुगेका छन्। सदरमुकाम पछिको जिल्लाको दोस्रो ठूलो व्यापारिक केन्द्रका रूपमा परिचित चन्द्रनिगाहपुर नमुना गाउँ विकास समितिमा निजी लगानीका बैङ्कहरूको आकर्षण बढ्दो रहेको उद्योग वाणिज्य सङ्घ शाखा कार्यालय चन्द्रनिगाहपुरका अध्यक्ष सन्तलाल साह बताउनुहुन्छ। उहाँले उद्योग तथा वाणिज्यको क्षेत्रमा लगानी गर्ने राष्ट्रिय वाणिज्य बैङ्कसमेतको स्थापना चन्द्रनिगाहपुरमा हुनुपर्ने बताउनुभयो।