काठमाडौँ, असार ९ गते। एसीसी यु-१९ एसिया कपमा नेपालले कमजोर सुरुवात गरेको छ। नेपाल पहिलो खेलमा पाकिस्तानसँग नराम्ररी आठ विकेटले हार्यो।
एसीसीको वेभसाइटका अनुसार मलेसियाको बायुमास ओभल क्रिकेट मैदानमा पाकिस्तानले शनिबार टस जिती लिएको पहिले फिल्डिङ गर्ने निर्णय सही सावित भयो। पहिले ब्याटिङ गरेको नेपाल निर्धारित ५० ओभरमा ४६.१ ओभरमा मात्र खेलेर १५६ रनमा अलआउट भयो। पाकिस्तानले लक्ष्य ७५ बल बाँकी छँदै दुई विकेटको क्षतिमा १५७ रन बनाई हासिल गर्यो।
प्रारम्भिक ब्याट्सम्यान सामी अस्लमले अविजित ८२ रनको पालि खेलेपछि पाकिस्तानको जित सहज बन्यो। अस्लमले कप्तान बबर आजमसँग मिलेर पहिलो विकेटका लागि ९८ रनको साझेदारी निर्वाह गरेका थिए। आजम ४८ रनमा छँदा राहुल विकले सुभाष खकुरेलको हातबाट स्टम्प्ट आउट गराए, त्यसपछि सागर पुनले इमाम उल हकलाई आठ रनमा पभेलियन फर्काए।
त्यसपछि अस्लमले उमर वाहिदसँग अविजित साझेदारी गर्दै पाकिस्तानलाई सहज जित दिला ए। अस्लमले ११५ बलको सामना गर्दै १२ चौका प्रहार गरे। वाहिद १० रन बनाई अन्तसम्म आउट भएनन्। सागर पूरा दस ओभर बलिङ गरी २४ रन मात्र खर्चेर एक विकेट पनि लिएर नेपालका सर्वाधिक सफल बलर बने। प्रारम्भिक बलर अविनाश कर्णले पनि पाँच ओभरमा मात्र १२ रन खर्चे।
यसअघि, नेपालका लागि नरेश बुढाएरले ८५ बलमा सर्वाधिक ३४ रन बनाए। कप्तान पृथु बास्कोटा र राजु पुलामीले पनि क्रमशः २८ र २३ रनको उपयोगी पालि खेले तर यी ब्याट्सम्यानले लामो पालि खेल्न नसक्दा पाकिस्तानसामु ठूलो लक्ष्य प्रस्तुत गर्न सकेन।
प्रारम्भिक ब्याट्सम्यानद्वय सुभाष ६ र प्रदीप ऐर १८ रनमा आउट भएपछि नेपाल दबाबमा परेको थियो। प्रदीपले १८ रनमा सङ्क्षिप्त पालिमा तीन चौका प्रहार गरे।
नेपाली प्रशिक्षक पुबुद दसानायकेले खेलाडीहरूले सक्दो कोसिस गरे पनि खेल जित्न नसकेको कारण दुःख लागेको प्रतिक्रिया दिए। समूह 'ए'अन्तर्गत अर्को खेलमा भारतले आयोजक मलेसियालाई आठ विकेटले नै हराएको छ। नेपालले मलेसियाविरुद्ध सोमबार खेल्नेछ।
