काठमाडौँ, असार १७ गते। राति सवारीसाधन नपाइने समस्याले हतारिने गर्नुभएको छ ? सवारीसाधनकै कारण राति अबेरसम्म रेस्टुरेन्टमा निर्धक्कसित बसेर परिकारका स्वाद लिन पाइरहनुभएको छैन ? राति आकस्मिक रूपमा अस्पताल जान यातायात अभावका कारण समस्या हुँदै आएको छ ?

रात्रि सवारीसाधनको असुविधालाई लिएर अब सुर्ता नलिनुहोस्। काठमाडौँ महानगरपालिका र नेपाल यातायात राष्ट्रिय महासङ्घको सहकार्यमा आगामी भदौ १ गतेदेखि रात्रिबस सेवा सञ्चालन हुने भएको छ। त्यसका लागि आइतबार कामपा र महासङ्घबीच सम्झौतापत्रमा हस्ताक्षर सम्पन्न भएको छ।

महानगरपालिकाका कार्यकारी अधिकृत केदारबहादुर अधिकारीले भन्नुभयो, "साँझ छ बजेपछि यातायातको समस्याले गन्तव्यमा पुग्न उपत्यकावासीलाई हतार हुन थाल्छ। उनीहरूलाई राति अबेरसम्म सुविधा होस् भनेर रात्रिबस सेवा सुरु गर्न लागिएको हो।"

कामपाका अनुसार रात्रिबस सेवाका लागि १४ वटा बस सञ्चालन गरिनेछ। हाललाई बाँसबारीदेखि रत्नपार्क, जोरपाटीदेखि रत्नपार्क, कलङ्कीदेखि रत्नपार्क, सातदोबाटोदेखि रत्नपार्क, तीनकुनेदेखि सिनामङ्गल हुँदै रत्नपार्क, बबरमहलदेखि तीनकुने हुँदै कोटेश्वर र चक्रपथ दायाँ तथा बायाँतर्फ गरी सातवटा रुट तय गरिएका छन्।

छ महिनासम्म परीक्षण गर्न भनेर कामपाले यातायात व्यवसायीलाई ४५ लाख रुपियाँ उपलब्ध गराउने भएको छ। राति ८ बजेदेखि ११ बजेसम्म बस सञ्चालन गरिने र हाललाई प्रत्येक एक घण्टामा बस आउजाउ गर्नेछ। कार्यकारी अधिकृत अधिकारीले यात्रुको सङ्ख्या बढ्दै गएपछि बस छुट्ने समय घट्दै जाने बताउनुभयो।

रात्रिबसमा सीसीटिभी जडान गरिने भएको छ। सीसीटिभीले यात्रुको हरेक गतिविधिलाई नियाल्नेछ। आपराधिकलगायतका कार्य रोक्न सीसीटिभी जडान गरिने भएका छन् भने हाल दिउँसो सञ्चालन भइरहेका बसलाई नै रात्रिबसका रूपमा प्रयोग गरिने भएको छ।

आगामी भदौदेखि कात्तिकसम्मका लागि रात्रिबसमा पनि हाल दिवा बस सेवाले लिँदै आएको भाडा कायम गरिएको छ। "राजधानीवासीले परिवारका साथमा अबेरसम्म रेस्टुरेन्टमा बिताउने सोच पूरा हुनेछ" कामपाका कार्यकारी अधिकृत अधिकारीले भन्नुभयो, "निश्चित समयमा बस गुड्ने अवस्था आउन सकेमा विश्वसनीयता कायम हुन सक्छ।"

महानगरपालिका प्रहरी परिसर काठमाडौँका प्रवक्ता धीरजप्रताप सिंहले रात्रिबस सेवालाई सुरक्षित तुल्याउन बसभित्र सादा पोशाकका तथा हतियारधारी प्रहरी परिचालन गरिने बताउँदै थप्नुभयो, "त्यस बाहेक २१ वटा मोटरसाइकलमा प्रहरीले गस्ती गरिरहने छन्। बसमा प्रहरी बस्ने भएकाले ढुक्क भएर यात्रा गर्दा हुन्छ।"

महासङ्घको बागमती अञ्चल संयोजक धर्मराज रिमालले गुण्डागर्दी, पकेटमार र जड्याहाका साथै सडक बत्तीको समस्या रहेको बताउँदै ती समस्या हुन नदिन राज्यले प्रतिबद्धता व्यक्त गरेमा रात्रिबस सेवा सधैँका लागि सञ्चालन गर्न आफूहरू तयार रहेको बताउनुभयो।