काठमाडौँ, असार १७ गते। राष्ट्रिय सहमतिका लागि नयाँ प्रधानमन्त्रीको नाम अविलम्ब दिन नेपाली काँग्रेसका सभापति सुशील कोइरालालाई नेकपा -एमाले) का अध्यक्ष झलनाथ खनालले आग्रह गर्नुभएको छ । आइतबार साँझ खनाल निवास डल्लुमा पुग्नुभएका सभापति कोइरालालाई अध्यक्ष खनालले यस्तो आग्रह गर्नुभएको हो ।
दलहरूबीच यसअघि भएको पाँचबुँदे सहमतिमा काँग्रेसको नेतृत्वमा आगामी सरकार बनाउने सहमति भएको थियो । भेटपछि सभापति कोइरालाले राजनीतिक निकास र आगामी बजेटका विषयमा छलफल भएको जानकारी दिनुभयो । उहाँका अनुसार राजनीतिक सहमतिबिना पूर्ण बजेट आउन नसक्ने र राजनीतिक निकासका लागि दलहरूबीच छलफल चलाउने विषयमा दुई नेताबीच कुराकानी भएको थियो ।
अध्यक्ष खनालले सरकारले सहमतिबिना बजेट ल्याएमा प्रतिकार गरिने भन्दै नयाँ प्रधानमन्त्रीको नाम छिटो तय गर्न कोइरालालाई स्मरण गराएको जानकारी दिनुभयो ।
उहाँले राजनीतिक निकास वा आन्दोलनका लागि आफूहरू मिलेर जाने समझदारी भएको पनि पत्रकारलाई बताउनुभयो । रासस
