काठमाडौँ, असार १७ गते। नेपाली काँग्रेसका सभापति सुशील कोइरालाले पार्टीलाई एकजुट बनाउने अभियानमा जुट्न महिला सङ्घका कार्यकर्ताहरूलाई आग्रह गर्नुभएको छ। पार्टीले महिलालाई जिम्मेवारी र भूमिका दिने कुरामा कुनै कमी नगर्ने तर त्यसका लागि महिलाहरू सशक्त भएर आउन आवश्यक रहेको उहाँले औँल्याउनुभयो।

नेपाली राजनीतिका शिखर पुरुष गिरिजाप्रसाद कोइरालाको ८९औँ जन्मजयन्तीका अवसरमा नेपाल महिला सङ्घले आइतबार राजधानीमा आयोजना गरेको अन्तरक्रिया कार्यक्रममा सभापति कोइरालाले सो कुरा बताउनुभएको हो। शिखर पुरुष गिरिजाप्रसाद कोइरालाकै योगदानका कारण हत्या हिंसामा रहेको माओवादीलाई शान्तिपूर्ण राजनीतिमा सहभागी भएको दाबी उहाँले गर्नुभयो। पार्टी स्व. कोइरालाकै मागदर्शन अनुसार अघि बढेको उहाँले बताउनुभयो।

कार्यक्रममा नेकाका पाका नेता तथा केन्द्रीय सदस्य भीमबहादुर तामाङले महिलालाई जिम्मेवारपूर्ण स्थान दिएमा पार्टी अझ सशक्त हुने विचार व्यक्त गर्नुभयो। नेका केन्द्रीय सदस्य सुजाता कोइरालाले महिलालाई पार्टीमा जिम्मवारपूर्ण भूमिका नदिइएको भन्दै असन्तुष्टि जनाउनुभयो। राजनीतिक गतिरोधको निकासका लागि सहमतिको विकल्प नभएको उहाँको भनाइ छ।

अर्का केन्द्रीय सदस्य मीना पाण्डे र ईश्वरी न्यौपानेले संविधानसभाको निर्वाचन हार्ने कुराको पूर्वजानकारी हुँदा पनि निर्वाचन गराएर सभापति कोइरालाले ऐतिहासिक जिम्मेवारी पूरा गर्नुभएको बताउनुभयो।

महिला नेत्री एवं केन्द्रीय सदस्य पुष्पा भुसालले नयाँ संविधानसभाको निर्वाचन असम्भव भएको विचार व्यक्त गर्नुभयो। नेका केन्द्रीय सदस्य बद्री पाण्डेले नेपाली राजनीतिका शान्ति र क्रान्ति नायक गिरिजाप्रसाद कोइरालाको सपना पूरा गर्न बलियो काँग्रेस जरुरी भएको विचार व्यक्त गर्नुभयो।

नेपाली काँग्रेस काठमाडौँका सभापति भीमसेनदास प्रधानले गिरिजाप्रसाद कोइरालाको एकल घोषणाले मात्र मुलुकमा गणतन्त्र आएको दाबी गर्नुभयो। जनहितविपरीत चलेका प्रधानमन्त्री डा. बाबुराम भट्टराईको हालत पूर्वराजा ज्ञानेन्द्रको जस्तै हुने चेतावनी पनि उहाँले दिनुभयो।

नेविसङ्घका पूर्वअध्यक्ष गुरुराज घिमिरेले स्व. कोइराला एसियाकै उदाहरणीय नेता हुनुहुन्थ्यो भन्नुभयो। नेविसङ्घका अध्यक्ष रञ्जित कर्णले मुलुकलाई जातीय तथा धार्मिक आधारमा विभाजन गर्न खोज्ने प्रवृत्तिविरुद्ध सबै एकजुट हुनुपर्ने खाँचो औँल्याउनुभयो।