किभ, असार १७ गते। स्पेनले आइतबार राति इटालीलाई ४-० ले हराएर युरोपेली च्याम्पियनसिप फुटबल प्रतियोगिताको उपाधि रक्षा गरेको छ। स्पेनले लगातार तेस्रो पटक प्रमुख प्रतियोगिता जितेको हो। सन् २००८ मा युरो कप जितेपछि सन् २०१० मा स्पेनले विश्वकप ट्रफीमा पनि कब्जा जमएको थियो।
यस उपाधिसँगै स्पेनले पुनः आफूलाई विश्वको सर्वश्रेष्ठ टिम सावित गरेको छ। यसैगरी, तीन पटक उपाधि जितेर स्पेनले सर्वाधिक उपाधि जित्ने जर्मनीको कीर्तिमान बराबर गर्यो। यो जित युरो फाइनलमा सर्वाधिक अन्तरको जित पनि हो। यसअघि सन् १९७२ मा पश्चिम जर्मनीले सोभियत युनियनलाई ३-० ले हराएको नै कीर्तिमानको रूपमा रहेको थियो। विश्वकप फुटबलमा पनि ४-० फाइनल जितेको इतिहास छैन। पेलेको ब्राजिलियाली टिमले पनि दुई पटक एकपक्षीय रूपमा विश्वकप जित्दा तीन गोलको अन्तर मात्र रहेको थियो।
युरो २०१२ मा स्पेनले निरस शैलीमा खेल्यो भनी आलोचाना खेपेको स्पेनले फाइनलमा आक्रामक फुटबल खेली आलोचकलाई चुप पार्यो। स्पेनका लागि पूर्वार्द्धमा डेभिड सिल्भा र जोडी अल्बा तथा उत्तरार्द्धमा स्थानापन्न खेलाडीद्वय फर्नान्डो टोरेज र हुँवा माटाले गोल गरे।
खेलको ६४औँ मिनेटमा मिडफिल्डर थियागो मोटा घाइते भएर खेल्न नसक्ने भएर दस जनामा सीमित बनेपछि इटालीको खेलमा फर्किने सभावना समाप्त भएको थियो। मोटा सात मिनेटअघि मात्र स्थानापन्न खेलाडीको रूपमा मैदान छिरेका थिए। प्रशिक्षक सिजार प्रान्डेलीले तीन खेलाडी परिवर्तन गरिसकेकाले मोटा घाइते हुँदा इटालीले ठूलो मूल्य चुकाउनु पर्यो।
हामी इटालीको सम्मान गर्छौँ, इटाली महान प्रतिद्वन्द्वी हो तर आज हामीले खेलमा नियन्त्रण बनायौँ, स्पेनका प्रशिक्षक भिन्सेट डेल बोस्कले भने। डेल बोस्क विश्वको तीन सर्वाधिक प्रतिष्ठित फुटबल प्रतियोगिता युरो, विश्वकप र च्याम्पियन्स लिग जित्ने एक मात्र प्रशिक्षक बनेका छन्।
पूर्वार्द्धमा दुवै टिमले बराबरीको खेल खेले पनि उत्तरार्द्ध एकपक्षीय बन्यो। आजको रात प्रतिस्पर्धा नै भएन, स्पेनले उन्नत खेल खेल्यो, इटालीको कप्तान तथा गोलरक्षक गियान्लुजी बुफनको भनाइ छ। स्पेनका गोलरक्षक तथा कप्तान इकेर कासिलासले केही राम्रा प्रहार बचाउँदा पनि इटाली खेलमा फर्किन सकेन। कासिलासको नेतृत्वमा नकआउट चरणमा स्पेनको यो लगातार दशौँ जित हो। यसैगरी राष्ट्रिय टिमको जर्सीमा कासिलासको यो सयौँ जित पनि हो। सन् २००६ को विश्वकप दोस्रो चरणमा प|mान्ससँग ३-१ ले हारेको खेलमा जिनेदिन जिदानबाट गोल बेहोरेपछि स्पेनको जर्सीमा कासिलासले नकआउट खेलमा विपक्षी टिमलाई बल गोलपोस्टमा छिराउन दिएका छैनन्।
इटालीका प्लेमेकर एन्दि्रया पिर्लो र स्ट्राइकर मारियो बालोटेलीले कोसिस गर्दागर्दै पनि स्पेनी डिफेन्सको कडा निगरानीमा प्रभावित पार्न सकेनन्।
खेलको १४औँ मिनेटमा सेच फाबि्रगासको सटिक 'चिप ब्याक' पासमा सिल्भाले हेडमार्फत् बल गोलपोस्टमा छिराए। सिल्भाको यो सफलतालाई युरो २०१२ कै सर्वश्रेठ हेड गोलको रूपमा लिइएको छ। पूर्वार्द्ध सकिन चार मिनेट बाँकी छँदा स्पेनले आप\mनो अग्रता दोब्बर पार्यो। प्रत्याक्रमणमा हर्नान्डेज मिलाइदिएको पासमा अल्बाले इटालीका चार डिफेन्डरको बीचबाट बल लग्दै गोल गरे।
खेलको ८४औँ मिनेटमा जाभीको पास सदुपयोग गर्दै टोरेजले गोलरक्षक बुफनसँगको एक्लो जम्काभेटमा बल गोलपोस्टमा छिराए। त्यसपछि टारेजको पासमा माटाले अन्तिम गोल गरे। जुन गोल प्रतियोगितामै माटाको पहिलो प्रहार थियो। चेल्सीका प्रमुख खेलाडी माटा यसअघि बेन्चमै थन्किएका थिए। एएफपी
