भैरहवा, असार २१ गते। चालू वर्षको छ महिनामा स्थलमार्गको बेलहिया नाका हुँदै नेपाल भ्रमणका लागि आउने विदेशी पर्यटक -भारतीयबाहेक)को सङ्ख्या ६३ हजार ८०८ पुगेको छ। पर्यटक आगमन सङ्ख्या गतवर्षको सोही अवधिभन्दा नौ हजार ८०७ ले बढी हो। गतवर्ष ६ महिनामा ५४ हजार पर्यटक स्थलनाकाबाट आएको अध्यागमन कार्यालय बेलहियाका प्रमुख यादवराज पाण्डेले बताउनुभयो।

छ महिनाको बीचमा यस अवधिमा विभिन्न सङ्गठनले ३० दिनभन्दा बढी जिल्ला बन्द आयोजना गरेका थिए। त्यसो हुँदाहुँदै पर्यटक आगमन निकै राम्रो भएको यहाँका पर्यटन व्यवसायीको भनाइ छ।

बेलहियाबाट चालू वर्षको जनवरीमा सात हजार ९५८, फेब्रुअरीमा २२ हजार २६९, मार्चमा २३ हजार ३०९, अपि्रलमा ७ हजार १४०, मेमा एक हजार ९४३ र जुनमा एक हजार ४७५ पर्यटक आएको अध्यागमन कार्यालयले जनाएको छ।

मे महिनामा पर्यटक आगमन सङ्ख्यामा कमी आए पनि जुन महिनामा भने गतवर्षको तुलनामा ३८७ पर्यटक बढी आएका छन्। मे महिनामा १० तारिखदेखि २७ सम्म भएको १८ दिनको लामो बन्दले गर्दा स्थलमार्ग भएर आउने पर्यटकको सङ्ख्यामा कमी आएको थियो।

बेलहिया नाका स्थलमार्ग हुँदै पर्यटक भित्रिने सबैभन्दा ठूलो नाका हो भने त्रिभुवन विमानस्थलपछि सबैभन्दा बढी पर्यटक यसै नाका भएर नेपाल प्रवेश गर्ने गरेको पाइन्छ।

अहिले पर्यटन क्षेत्रलाई बेमौसमी महिना मानिने गरे पनि पर्यटक आगमन राम्रो रहेको र भारतीय पर्यटकको आगमन पनि राम्रो रहेको सिद्धार्थ एसोसिएसन अफ ट्राभल एजेन्ट -साटा) लुम्बिनी च्याप्टरका अध्यक्ष सञ्जय बजिमयले उल्लेख गर्नुभयो।

यो नाका हुँदै सबैभन्दा बढी पर्यटक श्रीलङ्काबाट आउनेगरेका छन् भने दोस्रो स्थानमा थाइल्यान्ड र तेस्रोमा म्यान्मारका पर्यटक रहेका छन्। दक्षिण कोरिया र चीनका पर्यटकसमेत स्थलमार्गबाट आउने क्रम बढेको छ भने युरोपियन पनि उल्लेख्य सङ्ख्यामा बेलहियास्थल नाकाबाट आउने गरेका छन्। स्थलमार्ग भएर आउने प्रायः पर्यटकको मुख्य गन्तव्य बुद्धजन्मस्थल लुम्बिनी हो भने दोस्रो गन्तव्यका रूपमा काठमाडौँ, पोखरा, चितवन रहेका छन्।