काठमाडौं, असार २२ गते। माओवादी सेनाका लडाकूको उमेरका विषयमा विवाद उत्पन्न भए पछि सेना समायोजनको अन्तिम चरणमा पुगेको भर्ना तथा छनोट प्रक्रिया अवरुद्ध भएको छ।

समायोजनका लागि भर्ना तथा छनोट प्रक्रिया थालनी गर्ने भनेर नयाँ भर्ति प्रक्रिया झैं नापजाँच गर्ने काम भएको भन्दै शिविरहरूमा लडाकूहरूले विरोध गरे पछि नेपाली सेनाले जारी प्रक्रियालाई तत्कालका लागि स्थगित गरेको बताएको छ।

नेपाली सेनाका प्रवक्ता रमिन्द्र क्षेत्रीले भर्ना तथा छनोट प्रक्रिया स्थगित भएको कुरालाई पुष्टि गर्दै शुक्रवार साँझ गोरखापत्रसँग भन्नुभयो, "केही समयका लागि जारी प्रक्रिया स्थगित भएको छ, पुनः सुचारु हुन सक्छ।"

चितवनका शक्तिखोरस्थित माओवादी सेनाका लडाकू रहेको तेस्रो डिभिजनको मूल प्रवेशद्वारमा लडाकूहरूले समायोजनको प्रक्रिया नभएर भर्ति प्रक्रिया झैं नापजाँच गर्न थालेकाले आफूहरूले विरोध गरेको जानकारी दिएका छन्।

हाम्रा चितवन समाचारदाता शान्ता अधिकारीका अनुसार दिनेश रामजी स्मृति बि्रगेडका बटालीयन सहकमाण्डर ढलकबहादुर मोक्तानले लडाकूहरूलाई भर्ति प्रक्रियामा समावेश गर्न खोजेकाले यो प्रक्रिया तत्काल खारेज गरी सम्मानजनक समायोजन नभएको खण्डमा आफूहरूले आन्दोलन गर्ने चेतावनी दिनुभयो।

संयुक्त राष्ट्रसंघले आफूहरूलाई अन्तर्राष्ट्रिय मापदण्ड अनुसार एक पटक प्रमाणित गरिसकेपछि नेपाली सेनाले पुनः छाती नाप्ने, स्वास्थ्य चेकजाँच गर्ने, उमेर नपुगेको बनाउने जस्ता काम गरेकोमा आफूहरूले आपत्ति जनाएको मोक्तानले बताउनुभयो।

लडाकूहरूले स्वैच्छिक अवकाशमा जाने लडाकूलाई एकमुष्ट रकम पाउनुपर्ने माग पनि राखेका छन्। यद्यपि यसअघि स्वैच्छिक अवकाशमा जाने लडाकूले पाउने रकमलाई दुई किस्तामा पाउने व्यवस्था गरिएको छ।

शुक्रवार दिउँसो समायोजनमा जान पाउने भन्दै खुसीका साथ मादल बजाउँदै नाचगान गर्दै मुख्य प्रवेशद्वारमा बसेका लडाकूहरू केही समय पछि त प्रक्रियामा कुरा नमिलेको भन्दै नाराबाजीमा उत्रिएका थिए।

सेनाले छनोट कार्यविधि र पाठ्यक्रम निर्माण गरिसकेपछि गत बुधवारदेखि भर्ना प्रक्रिया सुरु गरेको हो। उता नवलपरासीस्थित चौथो डिभिजनमा पनि भर्ना तथा छनोट प्रक्रिया अवरुद्ध भएको छ ।

नेपाली सेनाका टोलीले यहाँ स्थित शिविरमा रहेका कुल ३०२ लडाकूमध्ये १७२ जनालाई बिहीवारसम्म फाराम वितरण गरेको नवलपरासीस्थित हाम्रा समाचारदाता होमराज रानाभाटले जनाउनुभएको छ। जसमध्ये ७४ जना लडाकूले फाराम बुझाएका छन्।

उता पाँचौं डिभिजनमा पनि प्रक्रिया अवरुद्ध भएको हाम्रा समाचारदाता टीकाराम बस्नेतले जनाउनुभएको छ।

कुल ८० जनाले फाराम लिए पनि भर्ना प्रक्रियाप्रति असहमति जनाउँदै लडाकूहरूले फाराम भर्न मानेनन्।