काठमाडौं, असार २५ गते। अग्रगामी विचार समूह बनाएर पार्टी अन्तरसङ्घर्ष सञ्चालन गरिरहेका नेकपा -एमाले) का आदिवासी जनजाति एवं मधेशी नेताहरूले पाटीको स्पष्टीकरणलाई 'पर्ख र हेर' को रूपमा लिनुभएको छ।

केन्द्रीय अनुशासन आयोगको बिहीवार बसेको बैठकले विचार समूह बनाएर पार्टी पद्धतिविरुद्ध बोल्दै हिँड्नेहरूसँग स्पष्टीकरण सोध्ने निर्णय गरेको थियो। तर, शनिबारसम्म स्पष्टीकरणको कुनै पत्र आफूहरूले नपाएको आदिवासी जनजाति नेताहरूले बताउनुभएको छ।

अनुशासन आयोगको बैठकपछि अञ्चलस्तरीय कार्यकर्ता भेलाका लागि आयोगका अध्यक्ष अमृत बोहरा पश्चिमतिर लाग्नुभएको छ। सचिव हरि सापकोटा चितवनतिरै स्वास्थ्य उपचार गराइरहनुभएको छ। स्पष्टीकरणको पत्र पठाइएको वा नपठाइएको बारे आफूलाई कुनै जानकारी नभएको बताउनुभयो। स्पष्टीकरण पत्र पठाइएको वा नपठाइएको बारे जानकारी लिन अध्यक्ष बोहरासँग सम्पर्क गर्दा उहाँले सोबारे कार्यालयमा सोध्न आग्रह गर्नुभयो। तर, कार्यालयमा सम्पर्क गर्दा 'स्पष्टीकरणको पत्र पार्टीले काट्ने हो कि आयोगले ? अध्यक्षलाई नै सोध्नुस् न ' भन्ने जवाफ प्राप्त भयो।

त्यस्तै, अयाोगका सदस्य अमर गिरीले पार्टी अनुशासन, पद्धतिविरुद्ध गतिविधि गर्ने केन्द्रीय तहसम्मका नेताहरूलाई स्पष्टीकरण सोध्ने निर्णय भएको जानकारी गराउनुभयो। उहाँले व्यक्तिगत रूपमा नै स्पष्टीकरण सोधिने भन्दै पार्टी पद्धतिसङ्गत ढङ्गले अन्तरसङ्घर्षलाई अगाडि बढाउन ध्यानाकर्षण गराइएको जानकारी गराउनुभयो।