विराटनगर, कात्तिक ९ गते । पूर्वप्रधानमन्त्री एवं नेपाली काङ्ग्रेसका सभापति गिरिजाप्रसाद कोइरालाले माओवादीले शान्ति सम्झौताको मूल भावनालाई बिर्सिएर सेना समायोजनको कुरालाई मात्र उछालिरहेको आरोप लगाउनुभएकोछ ।
"सहमति, सहकार्य र एकता शान्ति सम्झौताको मूल मर्म हो तर माओवादीले यो भावानालाई बिर्सिएर सेना समायोजनको कुरालाई मात्र उछालीरहेको छ ," कोइरालाको आरोप थियो ।
संविधानसभाको निर्वाचनपछि कार्यकर्तामा जागरण ल्याउने उद्देश्यले काङ्ग्रेसले विराटनगरबाट सुरु गरेको जनजागरण अभियानको शनिबार उद्घाटन गर्दै कोइरालाले माओवादीलाई सचेत गराउनु यो बेला आफ्नो कर्तव्य भएकाले यी कुरा गरेको स्मरण गराउनुभयो ।
उहाँले भन्नुभयो-"एगि्रमेन्टमा भएका सबै कुरा लागू हुनुपर्छ । सेना समायोजन पनि त्यस भित्रको एउटा प्रसङ्ग हो ।"
पूर्वप्रधानमन्त्री कोइरालाले नेपालको शान्ति सम्झौताको फर्मुलालाई र्नै हेरर विदशीहरूले अहिले सहयोग गरिरहेको जिकिर गर्दै भन्नुभयो-" उनीहरूले सहकार्य, सहमति र एकताको राजनीतिलाई मात्र सहयोग गरेका हुन् ।"
"बन्दुकको आवाज बोल्ने शान्ति होइन, प्रजातन्त्र र सहमतिको आवाज बोल्ने शान्ति अहिलेको आवश्यकता हो", कोइरालाले भन्नुभयो र थप्नुभयो, "तर प्रचण्डजी अहिले बाङ्गो बाङ्गो कुरा गर्न थाल्नुभएको छ । संसदीय व्यवस्था असफल भयो भन्ने कुराप्रति मेरा आपत्ति छ । "
पूर्वप्रधानमन्त्री कोइरालाको प्रश्न थियो प्रजातन्त्रको जननी मानिने संसदीय व्यवस्था कसरी असफल हुन सक्छ ? सभापति कोइरालाले यही जनजागरण अभियानमार्फत प्रधानमन्त्री प्रचण्डको ध्यानाकर्षण गराउन चाहेको बताउनुभयो ।
म प्रचण्डजीलाई यही सभामार्फत
'शान्ति सम्झौताको मर्म
सम्झाउन चाहन्छु- "राष्ट्र भनेको जनता हो , जनताबिनाको राष्ट्र हुन सक्तैन । माआवादीले जनतालाई बिर्सिए जस्तो छ ।"
पूर्वप्रधानमन्त्री कोइरालाले माओवादी यहाँसम्म कसरी आयो? काङ्ग्रेसले के भूमिका खेल्यो ? अनि के का लागि भूमिका खेलिएको हो, प्रचण्डजीले बिर्सनु हुँदैन भन्नुभयो ।
"अहिले प्रचण्डीजीले विभिन्न शब्दजालहरू बुन्दै विभिन्न कुराहरू गरेर जनतालाई त्यसभित्र फँसाइरहनुभएको भन्दै कोइरालाले तर यस्ता शब्दजालमा उहाँ आफैँ फस्तै गइरहेको दाबी पनि गर्नुभयो ।
उहाँले काङ्ग्रेसको हरेक पाइलामा इतिहास लेखिएको छ भन्दै माओवादीलाई शान्ति प्रक्रियामा ल्याउने इतिहास पनि काङ्ग्रेसले रचेको स्मरण गराउनुभयो । पूर्वप्रधानमन्त्रीको थप कथन थियो यस्तो इतिहास रचेको काङ्ग्रेसलाई कसैले परास्त गर्न सक्तैन । काङ्ग्रेस इतिहासका कारण यहाँसम्म आइपुगेको हो । यो सबैले बुझ्नुपर्छ ।
पूर्वप्रधानमन्त्री कोइरालाले कसैसँग सम्बन्ध भयो भने आˆनो बिर्सने बानी छैन भन्दै प्रधानमन्त्री प्रचण्डले भने पुरानो सम्बन्ध बिर्सने गरेको गुनासो गर्नुभयो । प्रचण्डजीसँग आफूले साडे तीन वर्ष सँगै काम गरियो तर उहाँ गलत बाटोमा जान लाग्नुभएको देखेर सम्झाउँदैछु, कोइरालाले भन्नुभयो ।
उहाँले वाईसीएलको ज्यादती र क्यान्टन्मेन्टमा थन्क्याइएका हतियारहरू लिएर संसद् प्रवेश गरेका घटनाप्रति आपत्ति जनाउनुभयो । उहाँले भन्नभयो, "यस्ता ज्यदतीहरूको विषयमा काङ्ग्रेस अब चूप लागेर बस्तैन प्रचण्डजीले यो कुरा राम्रोसँग बुझे हुन्छ ।"
शान्तिलाई तार्किक निष्कर्षमा पुर्याउने अठोट व्यक्त गर्दै क्रान्तिको बिगुल फुक्ने विराटनगरमा आएर आज शान्तिको बिगुल फुकेको पूर्वप्रधानमन्त्री कोइरालाले उद्घोष गर्नुभयो ।
उहाँले कार्यकर्ताहरूलाई भन्नुभयो-"तपाँइहरू यही शान्तिको सन्देश लिएर गाँउ-गाँउ जानुहोस् । आजदेखि काङ्ग्रेसमा कोही नेता छैनन् सबै कार्यकर्ता हुन्, म पनि कार्यकर्ता हुँ । यही समतानको सन्देश म दिन चाहन्छु ।
उहाँले तरुण, विद्यार्थी, मजदुर, महिलालगायत सबै कार्यकर्तालाई क्रान्तिकारी छबी जोगाइराख्न निर्देशन पनि दिनुभयो ।
सोही सभालाई सम्बोधन गर्दै नेपाली काङ्ग्रेसका वरिष्ठ नेता शेरबहादुर देउवाले शान्ति सम्झौताको सिँडी टेकेर सत्तामा पुगेको माओवादीले अराजकता र अशान्ति फैल्याइरहेको आरोप लगाउँदै भन्नुभयो-"उसले जनतालाई पिराल्ने र कार्यकर्ता पोस्ने नीति लिइरहेको छ ।"
कार्यवाहक सभापति सुशील कोइरालाले कब्जा गरिएका सम्पति,घर जग्गा अहिलेसम्म पनि फिर्ता नगरिएकाले माओवादीप्रति विश्वास गर्ने आधार नरहेको बताउनुभयो ।
उपसभापति रामचन्द्र पौडेलले माओवादी अहिले पनि हिंसाको पक्षमा रहेको उसका व्यवहारले देखाएको छ भन्दै शान्ति सम्झौताको पूर्ण पालन गर्न अनुरोध गर्नुभयो ।
नेपाली काङ्ग्रेस मोरङका सभापति अमृत अर्यालको सभापतित्वमा भएको कार्यक्रममा केन्द्रीय सदस्यहरू महेश आचार्य, कृष्णप्रसाद सिटौला, तीर्थराम डङ्गोल, ज्ञानेन्द्र कार्की, सुजता कोइराला, डा मिनेन्द्र रिजाल, डा शेखर कोइराला, युवा नेता गगन थापा, प्रदीप पौड्याल, महिला नेत्री अम्बिका बस्नेत, भुटनीदेवी खवास, डिगबहादुर लिम्बूलगायतका नेताहरूले पनि मन्तव्य व्यक्त गर्नुभएको थियो ।
नेपाली काङ्गेसले सुरु गरेको जन जागरण अभियानको माध्यमबाट दिगो शन्ति, लोकतन्त्रको स्थायित्व र नयाँ संविधान निर्माणको विषयलाई गाँउ गाँउसम्म पुर्यउने बताएको छ । शनिबार सम्पन्न जागरण सभामा पूर्वाञ्चलका झापा, मोरङ, सुनसरी, र धनकुटालगायतका जिल्लाबाट सहभागीहरू आएका थिए । कायकर्ता ओसार्न दर्जनौँ बसहरूको प्रयोग गरिएका थिए ।
