काठमाडौँ, कात्तिक १० गते । औद्योगिक घराना 'खेतान समूह'को गोर्खा बु्रअरीले राजस्व छलेको आरोपमा राजस्व अनुसन्धान विभागले छानबिन सुरु गरेको छ ।
राजस्व अनुसन्धान विभागले नियन्त्रणमा लिएका गोर्खा बु्रअरीका १४ वटा ट्रकमा राजस्व छलीका आधारहरू देखिएपछि विभागले छानबिन सुरु गरेको हो ।
दसैँको अघिल्लो दिन नियन्त्रणमा लिएको एउटा ट्रक र त्यसपछि नियन्त्रणमा लिएका १३ वटा ट्रकमा राजस्व छलीका आधारहरू फेला परेको विभागको उच्च स्रोतले जानकारी दिएको छ ।
ती ट्रकमा अन्तःशुल्क प्रक्रिया पूरा नगरेको आधार पनि राजस्व अनुसन्धान विभागले फेला पारेको स्रोतको दाबी छ । विभाग स्रोतका अनुसार नियन्त्रणमा लिइएका अधिकांश बियरमा स्टिकर टाँसिएको छैन भने केही बियरमा अन्तःशुल्कका स्टिकर दोहोर्याई तेहर्याई टाँसिएको छ ।
त्यसैगरी केही बियरमा अन्तःशुल्क स्टिकरको 'रिपेष्टिङ' -एकपटक टाँसिएका स्टिकरलाई पुनः टाँस्ने काम) समेत गरिएको छ । अन्तःशुल्क ऐन अनुसार बियरका प्रत्येक बोतलमा स्टिकर टाँस्नुपर्ने अनिवार्य व्यवस्था छ ती स्टिकरलाई रिपेस्टिङसमेत गर्न पाइँदैन ।
यसैगरी खेतान समूहकै १४ वटा ट्रकमध्ये एउटामा वाइन पनि फेला परेको छ । यो एक ट्रक वाइनमा पनि स्टिकर टाँस्ने काम ठिकठाक भए पनि प्रक्रियागत त्रुटि फेला परेको विभाग स्रोतले जानकारी दिएको छ ।
स्रोतका अनुसार काठमाडौँको एउटा बिक्री केन्द्रबाट अर्को बिक्री केन्द्रमा बिक्रीका लागि पठाएको भनी बिल बिजक जारी गरिए पनि वाइन तराईबाट काठमाडौँ आउँदै गर्दा नियन्त्रणमा लिइएको हो ।
राजस्व छलेको प्रारम्भिक अनुसन्धानका आधारमा गत साता विभागले दुईजना अनुसन्धान अधिकृतसहितको टोली गोर्खा बु्रअरीको उद्योग नवलपरासीमा पठाएको थियो । त्यो टोली आइतबार काठमाडौँ आइपुगेको र भोलिसम्म राजस्व छलीसम्बन्धी प्रारम्भिक प्रतिवेदन दिने पनि विभाग स्रोतले जानकारी दिएको छ ।
प्रारम्भिक प्रतिवेदनपछि गोर्खा बु्रअरीका विषयमा थप अनुसन्धान गरिने विभाग स्रोतले दाबी गरेको छ । डा. बाबुराम भट्टराई अर्थमन्त्रीमा नियुक्त भएपछि राजस्व छलीमा फेला पारेको यो अहिलेसम्मकै ठूलो घटना हो ।
विभागले नियन्त्रणमा लिएका ट्रक भने शुक्रबार छाडेको छ । विभागले ती ट्रकहरू चार करोड ३१ लाख रुपियाँ धरौटी राखेर छोडेको हो । खेतान समूहले धरौटीका लागि लक्ष्मी बैङ्ककलगायतका वित्तीय संस्थाबाट बैङ्क ग्यारेन्टी राखेको पनि विभाग स्रोतले जानकारी दिएको छ ।
यस विषयमा खेतान समूहले भने कुनै पनि प्रतिक्रिया दिएको छैन । आइतबार घटनाका विषयमा जानकारी लिन खेतान समूहका सञ्चालक तथा संविधानसभा सदस्य राजेन्द्र खेतानसँग सम्पर्क प्रयास भए पनि त्यो सफल हुन सकेन ।
नेपालको बियर बजारमा झन्डै ९० प्रतिशत अंश ओगट्ने खेतान समूहको गोर्खा बु्रअरीले काल्र्सवर्ग, टुबोर्ग, सानमिगेल र गोर्खा बियर उत्पादन गर्दै आएको छ । त्यसैगरी कम अल्कोहलको जोली ब्राण्डका मदिरा पनि गोर्खा बु्रअरीले उत्पादन गर्दै आएको छ ।
खेतान समूहले गोर्खा बियरलाई खाडीलगायत जापान, अमेरिका बेलायत आदि देशमा निर्यात गर्ने गरेको दाबी पनि गर्दै आएको छ ।
यसअघि खेतान समूह जोली ब्राण्डमा अल्कोहलको मात्रा र त्यसमा लाग्ने राजस्वसम्बन्धी विवाद तथा प्रत्येक बोतल बियरमा स्टिकर टाँस्ने विषयमा पनि विवादित बन्दै आएको थियो ।
मदिरा र बियरका प्रत्येक बोतलमा स्टिकर टाँस्ने विषयमा खेतान समूहले आपत्ति जनाएपछि राजस्व प्रशासनले स्टिकर टाँस्ने निर्धारित मिति पटक-पटक पछि सारेको थियो ।
गोर्खा बु्रअरी खेतान समूहको बजार व्यवस्था तथा डेनमार्कको बहुराष्ट्रिय कम्पनी काल्र्सवर्ग बु्रअरीजको प्राविधिक लगानीमा स्थापना गरिएको कम्पनी हो ।
काल्र्सवर्ग बु्रअरीजले गोर्खा बु्रअरी राजस्व छलीमा आरोपित भएकोमा कम्पनीप्रति आपत्ति जनाएको कम्पनी स्रोतले जानकारी दिएको छ । कम्पनी स्रोतका अनुसार काल्र्सवर्गले विवादित विषयमा गोर्खा बु्रअरी दोषी प्रमाणित भए कम्पनीबाट लगानी झिक्नेसम्मको चेतावनी दिएको छ ।
