काठमाडौँ, मङ्सिर ४ गते । प्रधानमन्त्री माधवकुमार नेपालसँग बिहीबार नेपालस्थित राष्ट्रसङ्घीय नियोग (अनमिन) प्रमुख करिन लेन्डग्रेनले भेट गर्नुभयो ।
सो अवसरमा संयुक्त राष्ट्रसङ्घजस्तो स्वतन्त्र एवं निष्पक्ष संस्थाबाट समेत नेपालको आन्तरिक मामिलामा एकतर्फी रूपमा धारणा आएको भनी प्रधानमन्त्रीले गुनासो व्यक्त गर्नुभएको उहाँका प्रेस सल्लाहकार विष्णु रिजालले जानकारी दिनुभयो ।
प्रधानमन्त्री नेपालले राजनीतिक सहमति कायम भई जनादेशबमोजिमको संविधान घोषित मितिमा सार्वजनिक हुने तथा शान्तिप्रक्रिया टुङ्गोमा पुर्याउने प्रतिबद्धता व्यक्त गर्नुभयो ।
यसैगरी अनमिन प्रमुख लेन्डग्रेनले राष्ट्रसङ्घका महासचिव वान की मुनको नेपालसम्बन्धी अभिव्यक्तिको बचाउ गर्दै सहज रूपमा नेपाललाई राजनीतिक निकास दिने हो भने सहमति कायम गरी अघि बढ्नुको विकल्प नरहेको स्पष्ट गर्नुभयो ।
भेटमा माओवादी लडाकू रेखदेख तथा व्यवस्थापनलगायत नेपालको समसामयिक राजनीतिक घटनाक्रम सम्बन्धमा पनि छलफल भएको थियो । प्रधानमन्त्री निवास बालुवाटारमा उहाँहरूबीच करिब ४५ मिनेट छलफल भएको थियो । रासस
