कैलाली, माघ १५ गते । कैलाली जिल्ला कुष्ठरोगको उच्च जोखिममा रहेको छ । पछिल्लो छ महिनामा एक बालकसहित ४६ जना कुष्ठरोगी फेला परेका छन् भने नयाँ र पुरानो गरी जिल्लामा आठ बालबालिका सहित १८७ जना कुष्ठरोगी रहेको जिल्ला जनस्वास्थ्य कार्यालय कैलालीले जनाएको छ ।
तीमध्ये ११ जना कुष्ठरोगी नियमित औषधि उपचारपछि सन्चो भएर घर फर्केका छन् ।
५९औँ कुष्ठरोग दिवसको अवसर पारेर जिल्ला जनस्वास्थ्य कार्यालय कैलालीले शनिबार धनगढीमा आयोजना गरेको पत्रकार अन्तक्रिर्यामा सो जानकारी दिइएको हो ।
कुष्ठ रोगको उच्च जोखिममा रहेका देशका १४ जिल्लामध्ये कैलाली छैटौँ स्थानमा रहेको जिल्ला जनस्वास्थ्य कार्यालय कैलालीका वरिष्ठ जनस्वास्थ्य प्रशासक जयबहादुर कार्कीले बताउनुभयो । उहाँले जिल्लामा हालसम्म १८७ जना कुष्ठरोगी रहेका छन्, ११ जना निःशुल्क औषधि उपचारपछि घर फर्केका छन्, उहाँले भन्नुभयो ।
जिल्ला जनस्वास्थ्य कार्यालयका अनुसार धनगढी, टीकापुर नगरपालिका सहित १८ गाउँ विकास समितिमा साउनदेखि पुससम्म सञ्चालन गरेको स्वास्थ्य अभियानमा ती कुष्ठरोगी फेला परेका र कैलालीमा प्रति १० हजार जनसङ्ख्यामा दुईजनामा कुष्ठ रोगी फेला परेका हुन् ।
त्यस अवसरमा सुदूरपश्चिम क्षेत्रीय स्वास्थ्य निर्देशक महेन्द्र श्रेष्ठले सुदूरपश्चिमका नौवटै जिल्ल्ाामा २५२ जना कुष्ठरोगी रहेकोमा कैलालीमा ५६ प्रतिशत कुष्ठरोगी रहेको जानकारी दिनुभयो । उहाँले अछाममा १६ जना, कञ्चनपुरमा ४३ जना, डोटीमा १६, दार्चुलामा पाँचजना, डडेल्धुरामा पाँचजना, बाजुरामा सातजना, बझाङ ११ जना र बैतडीमा १० जना कुष्ठरोगी रहेको बताउनुभयो । यहाँका पहाडी आठ जिल्लामा कुष्ठरोग निवारणको अवस्थामा रहेको भए पनि कैलालीमा कुष्ठरोगका बिरामी बढ्दै गएका छन् उहाँले भन्नुभयो, सबै ठाउँमा कुष्ठरोग निवारणका लागि सरकारी प्रयास जारी छ । कुष्ठरोगका बिरामीका लागि डडेल्धुराको टिम अस्पताल र कैलालीको सेती अञ्चल अस्पतालमा निःशुल्क औषधि उपचारको व्यवस्था रहेको र उपचार गराएर कुष्ठरोग पूर्णरूपमा सञ्चो भएर जाने बिरामीलाई सरकारले एक हजार रुपियाँ उपलब्ध गराउँदै आएको पनि उहाँले जानकारी दिनुभयो ।
कुष्ठरोगका बिरामीमा शरीरमा कालो फुस्रो दाग र हातखुट्टा झम्झमाउने लगायतका लक्षण देखिने भएकाले त्यस्ता व्यक्तिलाई नििजको स्वास्थ्य संस्थामा जँचाएर औषधि सेवन गर्न निर्देशक श्रेष्ठले आग्रह गर्नुभयो ।
