दैलेख, माघ १६ गते । निर्माणाधीन मध्यपहाडी राजमार्गको सात्तला गाविसमा ट्रयाक्टर दुर्घटना हुदाँ २५ जना घाइते भएका छन् । सात्तला गाविसको सामुदायिक वनबाट स्वस्तिक रोजिन एण्ड टर्पेन्टाइन कम्पनीको खोटो लिएर कणर्ाली राजमार्गको डाबतर्फ जाँदै गरेको लु १ त ८४ १५ नम्बरको ट्रयाक्टर सोही गाविसको सालुमा आइतबार दुर्घटना भएको हो ।
दुर्घटना परी घाइते भएका २५ जनामध्ये चारजनाको अवस्था गम्भीर रहेको खोटो कम्पनीका कर्मचारी टोपबहादुर विष्टले बताउनुभयो । गम्भीर घाइते हुनेमा सात्तला-४ का दीर्घ वि.क., लक्ष्मण वि.क. वीरबहादुरसमेत अर्का एक व्यक्ति छन् । घाइतेको स्थानीय जयलक्ष्मी मेडिकल हल रामघाटमा उपचार भइरहेको लेखापाल केशवबहादुर चन्दले बताउनुभयो ।
त्यसैगरी माघ ९ गते लकान्द्र गाविसको-९ को विस्कुना जङ्गलमा स्वस्तिक रोजिन टर्पेन्टाइनका कर्मचारी कुटपिट गरी रकम लुट्ने तीनजना पक्राउ परेका छन् । पक्राउ पर्नेमा लकान्द्र गाविसका वडा नं. ४ का काशीराम थापा, दिलिप थापा र धनबहादुर बोगटी पक्राउ परेका हुन् ।
लुटेराले-९ गते राति ७ बजे खोटो कम्पनीका लेखापाल केशवराज चन्द, रामचन्द्र पराजुली र सुपरभाइजर खेमासिह उचाइँलाई कुटपिट गरी दुई लाख २३ हजार रकम लुटेर लगेका थिए । कुटपिटबाट गम्भीर घाइते भएका सुपरभाइजरको बुटवल अस्पतालमा उपचार भइरहेको छ । फरार रहेका दुईजनाको खोजी कार्य भइरहेको प्रहरी चौकी ठाटीकाँधका प्रहरी निरीक्षक भुपेन्द्रविक्रम शाहले बताउनुभयो ।
