काठमाडौँ, चैत ८ गते। संयुक्त राष्ट्रसङ्घका महासचिव बान कि मुनको नेपाल भ्रमण स्थगित भएको छ। आगामी वैशाख १७ गतेदेखि गौतम बुद्धको जन्मस्थल लुम्बिनीमा सुरु हुने अन्तर्राष्ट्रिय सम्मेलनमा भाग लिन महासचिव बान वैशाख १६ गते नेपाल आउने तय भएको थियो।
राष्ट्रसङ्घका नेपालस्थित आवासीय प्रतिनिधि रोवर्ट पाइपरले सामाजिक सञ्जाल 'टुइटर'मार्फत बानको नेपाल भ्रमण समय 'रिसेड्युल्ड' -हेरफेर) गरिएको सन्देश बुधबार सार्वजनिक गर्नुभएको छ। उहाँले लुम्बिनी सम्मेलनको तयारीका लागि थप केही समय चाहिने र जारी शान्तिप्रक्रिया अन्यत्र नमोडियोस् भन्ने हेतुले बानको भ्रमण समयमा हेरफेर गरेको बताउनुभएको छ।
तर संयुक्त राष्ट्रसङ्घका महासचिव बानको नेपाल भ्रमण रद्द भएको वा स्थगित भएको भन्नेसम्बन्धमा माओवादी अध्यक्ष तथा बृहत्तर लुम्बिनी विकास समितिका निर्देशक पुष्पकमल दाहाल 'प्रचण्ड'को निजी सचिवालयले केही थाहा नभएको बताएको छ।
नेपाल सरकारका तर्फबाट केही दिनअघि मात्र नेपाल भ्रमणका लागि सरकारले बानलाई औपचारिक निम्तो पत्र पठाएको थियो। यसअघि माओवादी अध्यक्ष तथा बृहत्तर लुम्बिनी विकास समितिका निर्देशक पुष्पकमल दाहाल 'प्रचण्ड' अमेरिका भ्रमणका क्रममा महासचिव बानलाई नेपाल भ्रमणमा आउन र परिषद्को नेतृत्व गर्न निमन्त्रणा दिनुभएको र त्यही निमन्त्रणा स्वीकार्दै मुन नेपाल भ्रमणमा आउन लाग्नुभएको बताइएको थियो।
