काठमाडौँ, वैशाख १३ गते। बैङ्क अफ काठमाण्डू लिमिटेडले १० देखि २२ वर्ष उमेरका युवालाई लक्षित गरी 'बिओके चेतनशील युवा बचत' योजना प्रारम्भ गरेको छ।
न्यूनतम् सय रुपियाँ मौज्दातमा खाता खोल्न सकिने यस योजनामा ग्राहकलाई खुत्रुके निःशुल्क उपलब्ध हुने र बचत खाताहरूमध्ये उच्चतम ब्याज प्राप्त हुने बैङ्कले बुधबार आयोजना गरेको पत्रकार सम्मेलनमा जानकारी दियो।
बैङ्कका शाखाहरूबाहेक तोकिएको केही विद्यालय, क्लब जस्ता स्थानमा गई स-सानो रकम जम्मा गर्ने र निकाल्ने सुविधा यस योजनामा हुनेछ। पहिलो चरणमा परीक्षणको रूपमा अत्तरिया, सुर्खेत, गोङ्गबु र भक्तपुर शाखाबाट सुरु गरिएको यो योजना अब बैङ्कका सबै शाखाबाट उपलब्ध हुने बैङ्कले जनाएको छ।
पत्रकार सम्मेलनमा बैङ्कका प्रमुख कार्यकारी अधिकृत अजय श्रेष्ठले विभिन्न सञ्चार माध्यमलगायत सडक नाटक, विद्यालय, क्लब तथा युवा समुदायसँग सम्बन्धित गैरसरकारी संस्थासँग सहकार्य गरी युवा पुस्तामाझ वित्तीय कारोबार र बचतबारे जानकारी गराउने तथा उनीहरूलाई बचत गर्न उत्प्रेरित गर्ने गरी कार्ययोजना तयार गरिएको जानकारी दिनुभयो। उहाँले यस योजनामार्फत न्यून आय भएका र बचत गर्ने बानी नभएका युवाहरूलाई वित्तीय क्षेत्रको मूलधारमा समाहितको प्रयास गरिने बताउनुभयो। बैङ्क अफ काठमाण्डूले युथ सेभ परियोजनाअन्तर्गत यो योजना सुरु गरिएको जनाएको छ।
सेभ द चिल्ड्रेनको नेतृत्व तथा द मास्टर कार्ड फाउण्डेसनको सहयोगमा वासिङ्टन विश्वविद्यालयस्थित सामाजिक विकास केन्द्र, विपन्न वर्गको सहयोगका लागि परामर्श एकाइ र न्यू अमेरिका फाउन्डेसन नामक संस्थाहरूले नेपाल, कम्बोडिया, केन्या, घानामा सन् २०१० बाट यस परियोजना
सुरु गरेको हो।
यस परियोजना सञ्चालन सम्बन्धमा सेभ द चिल्ड्रेन तथा बैङ्क अफ काठमाण्डूबीच सन् २०१० मा नै सम्झौता भएको बैङ्कले जनाएको छ।
