काठमाडौँ, वैशाख १७ गते। अमेरिकी विदेश मन्त्रालयकी वाणिज्य तथा व्यापारसम्बन्धी विशेष प्रतिनिधि लोरेन हृयारिटनले शान्ति प्रक्रिया र संविधान निर्माणको काम सम्पन्न भएपछि विदेशी लगानी बढ्ने विश्वास व्यक्त गर्नुभएको छ।
नेपाल उद्योग वाणिज्य महासङ्घले आफ्नो सचिवालयमा आइतबार आयोजना गरेको अन्तरक्रियामा हृयारिटनले नेपालमा शान्ति र संविधान निर्माणको काम सम्पन्न हुने क्रममा रहेको यसपछि आर्थिक विकासमा नेपाल अगाडि बढ्ने भन्दै सो प्रक्रिया सम्पन्न भएपछि बाहृय लगानी बढ्नुका साथै आर्थिक विकासले गति लिने विश्वास व्यक्त गर्नुभएको हो।
नेपालमा उद्यमशीलता विकासको विषयमा आयोजना गरिएको अन्तर्त्रिmयामा उहाँले भारत र चीन ठूलो बजार रहेको नेपालको प्रचुर संभावना बोकेको मुलुकको हो भन्नुभयो।
उद्यमशीलताको एवं व्यावसायिक विकासको विषयमा नेपाल सरकार र यहाँको निजी क्षेत्रसँग छलफल गर्ने उद्देश्यले हृयारिटनको नेतृत्वमा अमेरिकी प्रतिनिधिमण्डल पाँचदिने भ्रमणमा शुक्रबार काठमाडौँ आएको हो।
युवालाई परिचालन गरी आर्थिक गतिविधिलाई नेपाल र यहाँको निजी क्षेत्रले बढावा दिनसक्ने भन्दै उहाँले उद्यमशीलताको विकासका लागि जनतामा व्यापक रूपमा चेतना र शिक्षाको विकास जरुरी रहेको पनि खाँचो औंल्याउनुभयो।
महासङ्घका अध्यक्ष सुरज वैद्यले नेपालमा आर्थिक विकास र रोजगारीका अवसर बढाउन उद्यमशीलताको विकास जरुरी रहेको भन्दै नेपाल सरकार र नेपालको निजी क्षेत्र अन्तर्राष्ट्रिय समुदायसँग व्यापारिक तथा लगानी सम्झौता गर्न तयार रहेको बताउनुभयो।
उहाँले आफूहरू विदेशी लगानीलाई स्वागत गर्न र उद्यमका लागि सहज वातावरण निर्माणमा लागिरहेको भन्दै नेपाललाई आवश्यक थप पुँजी, प्रविधि र अनुभवका लागि अन्तर्राष्ट्रिय क्षेत्रसँग सहकार्य गर्दै जाने आफूहरूको योजना रहेको बताउनुभयो।
गैरआवासीय नेपाली -एनआरएन) सङ्घका अध्यक्ष जीवा लामिछानेले विशेषगरी कामको खोजीमा बाहिर गएका पहिलो पुस्ताका एनआरएनहरू अहिले धेरै मुलुकमा विभिन्न पेसा व्यवसाय गरेर बसेको भन्दै उनीहरूबाट स्रोत जुटाउन नसके पनि ज्ञान, प्रविधि जुटाउन सकिने बताउनुभयो।
महिला उद्यमी महासङ्घकी अध्यक्ष छायाँ शर्माले नेपालमा महिलाद्वारा साना तथा मझौता उद्योगहरू सञ्चालन हुँदै आएको र त्यस्ता उद्योग सफल पनि रहेको भन्दै सहज वातावरण, नीति नियम, स्रोत साधन र अवसरको अभावले नेपाली महिला अगाडि बढ्न नसकेको बताउनुभयो।
युवा उद्यमी मञ्चका अध्यक्ष अनुजकुमार श्रेष्ठले युवा उद्यमशीलताका लागि उनीहरूलाई विविधिकरण र उनीहरूमा सकारात्मक सोचको विकास गरी मुलुकमा रहेको प्रचुर संभावनाको प्रयोगमा लगाउन सक्नुपर्ने बताउनुभयो।
सो अवसरमा उद्यमशीलता विकासमा नेपाली निजी क्षेत्रको भूमिका तथा सहकार्यको सम्भाव्यता तथा उद्यमशीलता विकासका सफल मोडलहरूका विषयमा छलफल गरिनुका साथै नेपालमा उद्यमशीलता विकासका लागि सहकार्य गर्ने सहमति भएको थियो।
महासङ्घ र द इन्डस इन्टरप्रेनरर्स -टाई) बीच सहकार्यसम्बन्धी समझदारी भएको थियो। सम्झौतापत्रमा महासङ्घका अध्यक्ष वैद्य र टाईका चार्टर्ड मेम्बर निकेश सिन्हाले हस्ताक्षर गर्नुभएको थियो।
विश्वव्यापी सन्जाल रहेको यस संस्थासँगको सहकार्यले उद्यमशीलताका क्षेत्रमा तालिम सञ्चालन, अनुभव आदानप्रदान जस्ता क्षेत्रमा सहयोग काम गर्न सकिने छ।
विश्वभर ५७ भन्दा बढी शाखामार्फत उद्यमशीलता विकासमा कार्य गर्दै आएको यस संस्थाले नेपालमा उद्यमशीलताको सफल मोडलको कार्यान्वयन, सञ्जाल विस्तार, जनचेतना अभिवृद्धि, लगानी आकर्षण, बौद्धिक सम्पत्तिको जगेर्ना गर्न सहयोग गर्ने महासङ्घले
जनाएको छ।
