|
काठमाडौँ, वैशाख २१ गते। प्रमुख तीन दल र मधेसी मोर्चाको बैठकमा दुई दिनभित्र राष्ट्रिय सहमतिको सरकार गठन र जेठ १४ अगावै संविधान घोषणा गर्ने प्रतिबद्धतासहित पाँचबुँदे सहमति भएको छ।
निकै लामो छलफल र बहसपछि एकीकृत नेकपा -माओवादी), नेपाली काँग्रेस, नेकपा -एमाले) र संयुक्त लोकतान्त्रिक मधेसी मोर्चाका शीर्ष नेताहरूबीच कात्तिक १५ गतेकोे सातबुँदे सम्झौताअनुसार बिहीबार यस्तो सहमति भएको हो।
दलका नेताहरूद्वारा हस्ताक्षरित सहमतिपत्रमा निर्धारित समयअगावै संविधान घोषणा गरिने, दुई दिनभित्र वर्तमान प्रधानमन्त्री डा. बाबुराम भट्टराईकै नेतृत्वमा सहमतिको सरकार गठन हुने, संविधान घोषणा गर्नुअधि प्रधानन्त्री डा. बाबुराम भट्टराईले राजीनामा दिई काँग्रेसको नेतृत्वमा राष्ट्रिय सहमतिको सरकार गठन गरिने र सोही सरकारले एक वर्षभित्र आमनिर्वाचन गर्ने
उल्लेख छ।
यस्तै तीन दिनभित्र संविधानका विवादित विषयलाई टङ्ग्याइने, विगतका सहमतिबमोजिम शान्तिप्रक्रिया अविलम्ब सम्पन्न गर्ने र संविधान निर्माणको कामलाई तीव्रता दिन दलका शीर्ष नेताहरूको नियमित बैठक बस्ने पनि सहमति भएको छ।
सो सहमतिपत्रमा माओवादीका अध्यक्ष पुष्पकमल दाहाल, काँग्रेस सभापति सुशील कोइराला, एमाले अध्यक्ष झलनाथ खनाल र मधेसी मोर्चाको तर्फबाट विजयकुमार गच्छदारले हस्ताक्षर गर्नुभएको छ।
सहमतिको वातावरण सहज बनाउन वर्तमान सरकारमा सहभागी माओवादी तथा मोर्चाका सबै मन्त्रीले बिहीबार राति नै बैठकस्थलमा प्रधानमन्त्रीसमक्ष राजीनामा दिएका थिए।
उपप्रधानमन्त्री तथा परराष्ट्रमन्त्री नारायणकाजी श्रेष्ठ र भौतिक योजना तथा निर्माणमन्त्री हृदयेश त्रिपाठीले राति ११ बजेतिर मन्त्रीहरूले राजीनामा दिएको जानकारी गराउनुभएको थियो।
संविधान निर्माणकार्य अघि बढाउन र सहमतिको सरकार गठन गर्न बिहीबार बिहानदेखि १७ घन्टासम्मको अन्तरपार्टी, द्विपक्षीय, त्रिपक्षीय र बहुपक्षीय छलफलले सहमतिको खाका तयार पारेको हो।
सहमतिको खाका तयार पार्नका लागि बुधबारको बैठकले माओवादी अध्यक्ष दाहाल, एमाले नेता माधवकुमार नेपाल, काँग्रेस महामन्त्री कृष्णप्रसाद सिटौला र मोर्चाका तर्फबाट गच्छदारलाई जिम्मेवारी दिएको थियो।
बैठकपछि सञ्चारकर्मीलाई प्रतिक्रिया दिँदै प्रधानमन्त्री डा. भट्टराईले भन्नुभयो, "दलहरूबीच निकै महìवपूर्ण सहमति भएको छ, यसले संविधान निर्माणको आधार तयार गरेको छ।"
नेपाली काँग्रेसका महामन्त्री कृष्णप्रसाद सिटौलाले आजको सहमति विगतमा भएका सहमतिहरूको उत्कर्ष भएको बताउँदै यसले नयाँ आशा र विश्वास जगाएको टिप्पणी गर्नुभयो।
"महìवपूर्ण सहमति भएको छ", एमाले अध्यक्ष खनालले भन्नुभयो, "राष्ट्रिय सहमतिको सरकारबिना शान्ति र संविधान निष्कर्षमा पुग्दैन भन्ने हाम्रो पार्टीको ठम्याइ थियो। यो सहमतिले सहमतीय सरकार बनाउने बाटो तय गरेको छ।"
|
