काठमाडौँ, वैशाख २२ गते। राष्ट्रिय सहमतिको सरकार गठनका लागि भएको पाँचबुँदे सहमतिपछि दलहरूले सरकारमा प्रतिनिधित्व गर्ने विषयलाई लिएर आन्तरिक छलफल तीव्र पारेका छन्।
बिहीबार अबेर राति भएको पाँचबुँदे सहमति अनुसार राष्ट्रिय सरकार गठनका लागि नेकपा एमालेको शुक्रबार मदननगर बल्खुमा बसेको केन्द्रीय कमिटीको बैठक ठोस निर्णयबिना नै टुङ्गिएको छ।
बैठकमा पाँचबुँदे सहमति र राष्ट्रिय सरकारमा कसले नेतृत्व गर्ने भन्नेबारेमा छलफल भए पनि कुनै निष्कर्ष निस्कन नसकेको बैठकपछि पार्टी सचिव शङ्कर पोखरेलले जानकारी दिनुभयो।
उहाँले बैठकमा आ-आफ्ना धारणा राख्ने नेताहरूले पाँचबुँदे सहमतिको प्रक्रिया र सरकारमा सहभागी हुने विषयलाई जोड दिएका बताउनुभयो।
उहाँका अनुसार कतिपय नेताले डा. बाबुराम भट्टराईकै नेतृत्वमा राष्ट्रिय सहमतिको सरकार गठन गर्ने सहमति अस्वाभाविक भएको
बताएका थिए।
बैठकमा पार्टी अध्यक्ष झलनाथ खनालले प्रमुख तीन दलसहित मधेसी मोर्चाको बैठकमा बिहीबार राति भएको पाँचबुँदे सहमतिबारे विस्तृत जानकारी गराउनुभएको थियो।
अध्यक्ष खनालले दिनुभएको जानकारी र राष्ट्रिय सहमतीय सरकारका विषयमा भनाइ राख्ने केन्द्रीय कमिटी सदस्यहरू बाँकी रहेकाले शनिबार बिहान ११ बजे पुनः बैठक बस्ने भएको छ। रासस
