काठमाडौँ, जेठ १८ गते। गतविजेता थेम्स र युनिभर्सल कलेज बिहीबार थेम्स इन्टरकलेज टी-ट्वान्टी क्रिकेट प्रतियोगिताको सेमिफाइनलमा पुगेका छन्।
यी दुई टिमसँगै सेमिफाइनलको समीकरण पूरा भएको छ। यसअघि डीएभी र कार्थफोर्ड कलेज सेमिफाइनलमा पुगेका थिए। फाइनल प्रवेशका लागि शनिबार थेम्सले डीएभीसँग र युनिभर्सलले कार्थफोड कलेजसँग प्रतिस्पर्धा गर्नेछन्।
आयोजक थेम्सले बिहीबार काठमाडौँको मोडल कलेज -केएमसी)लाई छ विकेटले हरायो। पहिले ब्याटिङ गरेको केएमसीले १९ ओभरमा सबै विकेट गुमाएर मात्र ८४ रन बनाएको थियो। थेम्सले १५.१ ओभरमा मात्र चार विकेटको क्षतिमा लक्ष्य पूरा गर्यो। उपाधि रक्षाको अभियानमा रहेको थेम्सको जितमा सागर मल्लले २७, विभवराज जोशीले २२ र प्रतीक श्रेष्ठले ११ रन बनाए। यसअघि बलिङमा थेम्सका लागि चार विकेट लिएका इरोज श्रेष्ठ 'म्यान अफ द म्याच' घोषित भए।
अन्तिम क्वाटरफाइनलमा युनिभर्सलले केसीएमआईटीलाई तीन विकेटले हरायो। केसीएमआईटीले १८.४ ओभरमा सम्पूर्ण विकेटको क्षतिमा १११ रन बनायो। युनिभर्सलले छ बलअघि नै सात विकेटको नोक्सानीमा ११४ रन बनाई खेल जित्यो। तीन चौकासहित २३ रन बनाएका युनिभर्सलका किरण सवश्रेष्ठ खेलाडी बने।
