काठमाडौँ । बृहत् मधेसी मोर्चा निर्माण गर्न प्रमुख भूमिका निर्वाह गर्नेमध्ये एक एमाओवादी केन्द्रीय सदस्य रामकुमार शर्माले मधेसी जनअधिकार फोरम नेपालका अध्यक्ष उपेन्द्र यादवद्वारा आफूहरूमाथि गरिएको कारबाहीलाई 'बचकाना' -केटाकेटीपन) को संज्ञा दिनुभएको छ।

"छायामा परेका, हराइरहेका उपेन्द्रजीलाई मधेसी, जनजाति, उत्पीडनमा परेका मानिसहरूको पक्षमा अगुवाइ गर्न हामीले अघि बढाएका थियौँ तर कैयौँ ठक्कर खाएर पनि उहाँको बुद्धि पलाएन", शर्माले भन्नुभयो।

"उहाँले काँग्रेस, एमालेलगायत सङ्घीयताविरोधी शक्तिलाई बल पुग्ने गरी अलोकतान्त्रिक बचकाना निर्णय गर्नुभयो", शर्माले गुनासो पोख्नुभयो।

नेता शर्माले भन्नुभयो, "यात्रा लामो थियो, हामी अधिकारको लडाइँको लामो यात्रामा निस्केका थियौँ, उहाँको ग्राफ पनि राम्रै बनिरहेको थियो तर उहाँ आफैँले आफूलाई ध्वस्त पार्नुभयो।"

"उहाँले साबित गर्नुभयो, उहाँको पार्टी टुक्रा टुक्रा उहाँकै अयोग्यताका कारण भएको रहेछ", शर्माले यादवको कदममाथि टिप्पणी गर्दै बताउनुभयो।