काठमाडौँ, जेठ २९ गते। एकीकृत नेकपा -माओवादी)का अध्यक्ष पुष्पकमल दाहाल 'प्रचण्ड'ले पहिचानमा आधारित सङ्घीयताको पक्षमा रहेका सबै पार्टी तथा शक्तिको संयुक्त मोर्चा बनाउने बेला भएको बताउनुभएको छ।
सोमबार पार्टी निकट मजदुर सङ्गठनका नेता कार्यकर्तालाई ललितपुरमा प्रशिक्षण दिँदै प्रचण्डले काँग्रेस, एमालेलगायतका केही दल सङ्घीयताको पक्षमा नरहेको आरोप पनि लगाउनुभयो।
दुई दलले मनैदेखि सङ्घीयता स्वीकार नगरेकै कारण संविधान नबनाई संविधानसभा भङ्ग भएको बताउँदै उहाँले आमजनताको चाहनाविपरीत जाने उनीहरूको 'यस्तै हर्कतका कारण' ती दलहरू जनताबाट पाखा लाग्दै गएको पनि दाबी गर्नुभयो। केही दिनअगाडि शक्ति प्रदर्शन भन्दै राजधानीमा २७ दलले गरेको आमसभाको सहभागिताले ती दलको हैसियत कस्तो छ भन्ने स्पष्ट देखिएको चर्चा गर्दै उहाँले भन्नुभयो, "उनीहरू जनतालाई अधिकार दिन चाहँदैनन्। जनतालाई अधिकार दिँदा उनीहरूलाई भाँडभैलो मच्चाउन खोज्यो भन्ने लाग्छ।"
माओवादीले असार १ गते राजधानीलगायत देशका ७५ वटै जिल्ला सदरमुकाममा गर्न लागेको आमसभामा सङ्घीयता पक्षधर सबै जनसमुदायको उपस्थिति हुने विश्वास व्यक्त गर्दै उहाँले यसका लागि पार्टीका सबै जनवर्गीय सङ्गठनले पहल गर्नुपर्ने बताउनुभयो।
