कोलकाता, असार ६ गते। भारत र इजरायलबीच खुला व्यापार सम्झौताको तयारी भइरहेको छ। त्यस्तो सम्झौता यसै वर्ष अर्थात् सन् २०१२ को अन्त्यसम्ममा हुने बताइएको छ।
अन्तर्राष्ट्रिय व्यापारलाई उच्च प्राथमिकतामा राख्दै विश्वका विभिन्न मुलुकहरूसँग खुला व्यापार सम्झौता गर्ने कार्यलाई तीव्रता दिने क्रममा भारतले इजरायलसँग व्यापार अभिवृद्धिका लागि सम्झौता गर्न लागेको हो।
दुई देशबीच हुने खुला व्यापार सम्झौतापछि एसियाको उदीयमान अर्थतन्त्र भारत र इजरायलबीचको द्विपक्षीय व्यापार वाषिर्क १५ अर्ब अमेरिकी डलरसम्म पुग्ने
बताइएको छ।
इजरायल सरकारका राजदूत एलोन उस्पीजका अनुसार सन् १९९२ मा भारत र आफ्नो मुलुकबीचको व्यापार १८ करोड अमेरिकी डलरको हाराहारीमा मात्र रहँदै आएको भए पनि दुई देशबीचको राजनीतिक सम्बन्धमा आएको सुधारले व्यापारमा पनि सकारात्मक प्रभाव पर्न थालेको र त्यसको परिणामस्वरूप सन् २०११ सम्ममा आइपुग्दा पाँच अर्ब अमेरिकी डलर पुगेको छ।
कृषि र उच्च प्रविधिको क्षेत्रमा निकै उन्नति गरेको इजरायल भारतमा पानीसम्बन्धी उच्च प्रविधि र कृषिमा प्रयोग हुने उच्च प्रविधिको क्षेत्रमा लगानी गर्न उत्सुकता देखाएको छ भने भारतले सूचना र प्रविधिलगायत आफ्ना दक्ष जनशक्तिलाई इजरायलमा अवसरको खोजी गर्दैछ।
