चितवन -रत्ननगर), असार २५ गते। चितवनको शक्तिखोरस्थित तेस्रो डिभिजनमा रहेका लडाकूहरूले शनिवारबाट गर्ने भनेको सडक आन्दोलन स्थगित भएको छ। आफूहरूको मागको विषयमा सरकार र एमाओवादी पार्टी सकारात्मक देखिएकाले आन्दोलन स्थगन गरिएको तेस्रो डिभिजन शक्तिखोरका लडाकू कवि लामाले जानकारी दिनुभयो।

यसअघि समायोजन प्रक्रियाप्रति असन्तुष्टि जनाउँदै उनीहरूले हिजो शिविरबाहिर आई प्रदर्शन गरेका थिए। आज १२ बजेसम्म मागको सुनुवाइ नभए सडकमा उत्रने घोषणा गरेका उनीहरूले आफूहरूको मागमा प्रधानमन्त्री लगायतका नेताहरू सकारात्मक देखिएको प्रतिक्रिया दिनुभयो।

शिविरका लडाकूहरूले सम्मानजनक समायोजन नभएको भन्दै हिजो उनीहरूले सडकमै नाराबाजी प्रदर्शन गरेपछि देशैभर समायोजन प्रक्रिया अवरुद्ध भएको थियो।