काठमाडौं, असार २५ गते। प्रधानमन्त्री डा. बाबुराम भट्टराईले सेना समायोजन प्रक्रिया सम्मानजनक विधिबाट हुने कुरामा ढुक्क हुन आग्रह गर्नुभएको छ। बुधवारदेखि नेपाली सेनाले शुरू गरेको माओवादी लडाकूको भर्ना तथा छनोट प्रक्रिया लडाकूहरूको विरोधले स्थगित भएपछि शनिवार प्रधानमन्त्री डा. भट्टराईलाई भेट्न बालुवाटार पुग्नुभएका पार्टी कार्यकर्ताहरूसँग प्रधानमन्त्रीले यस्तो आग्रह गर्नुभएको हो।

प्रधानमन्त्रीका निजी सहयोगी विश्वदीप पाण्डेले दिनुभएको जानकारी अनुसार पार्टी कार्यकर्ताहरूले सेना समायोजन प्रक्रिया सेनामा भर्ती झैँ भएको हो भन्ने प्रश्न राख्नुभएको थियो। पार्टी कार्यकर्ताहरूसँग प्रधानमन्त्री डा. भट्टराईले सरोकारवाला पक्षहरूसँग तत्काल समाधान खोजी हाल देखिएको प्राविधिक जटिलतालाई सुल्झाउने काममा आफू लागिरहेको आश्वासन दिनुभएको थियो।

लडाकूहरूले उठाएका मागहरू गम्भीर प्रकृतिका भएकाले त्यसप्रति सरकारले पनि गम्भीरतापूर्वक लिएको कुरा प्रधानमन्त्री डा. भट्टराईले बताउनुभएको छ। पाण्डेद्वारा जारी प्रेस विज्ञप्तिमा भनिएको छ- "प्रधानमन्त्री डा. भट्टराईले सेना समायोजन सम्मानजनक गर्ने कुरामा कुनै शंका नलिन पार्टी कार्यकर्ताहरूका माझ आग्रह गर्नुभयो।" शिविरमा उत्पन्न भएका प्राविधिक समस्यालाई छलफलका माध्यमबाट टुङ्गो लगाइनेछ।

प्रधानमन्त्री भट्टराईले देश राजनीतिक संक्रमणकालीन अवस्थाबाट गुजि्ररहेका बेला पार्टी कार्यकर्ताहरूलाई संयमित भएर अघि बढ्नसमेत निर्देशन दिनुभयो। उहाँले पार्टी कार्यकर्ताहरूलाई अग्रगामी शक्तिहरू एकजुट भएर मात्र प्राप्त उपलब्धिलाई संस्थागत गरी अघि बढ्नुपर्ने कुरा बताउनुभयो।

नेपाली सेनाले समायोजनका अन्तिम चरणका कार्यका लागि भर्ना तथा छनोट प्रक्रिया शुरू गरेको दोस्रो दिन भर्ती प्रक्रिया भएको भन्दै सबै शिविरमा नाराबाजी गरेपछि शुक्रवारदेखि जारी प्रक्रिया स्थगित गरिएको छ। उता सेनाले सरकारबाट थप निर्देशन नआएसम्म यो प्रक्रिया शुरु गर्न नसकिने बताएको छ।